Көлік полицейрлері «Anti-fraud» ЖПІШ аясында қаржылық сауаттылық мәселелері бойынша дөңгелек үстел өткізді

Республикалық «Anti-fraud» жедел-профилактикалық іс-шарасы аясында Көліктегі полиция департаментінің киберқылмысқа қарсы іс-қимыл бөлімінің қызметкерлері екінші деңгейлі банктер мен ұялы байланыс операторларының өкілдерімен бірлесіп «Нұрлы жол» теміржол вокзалында «Интернет-алаяқтықтың өсуі жағдайында азаматтардың қаржылық сауаттылығы» тақырыбында дөңгелек үстел өткізді. Кездесуге теміржол мекемелерінің қызметкерлері мен жолаушылар қатысып, оларға интернет-алаяқтық саласындағы өзекті қауіптер түсіндірілді.

Іс-шара халықтың қаржылық және цифрлық сауаттылығын арттыруға, сондай-ақ ақпараттық технологияларды пайдалану арқылы жасалатын құқық бұзушылықтардың алдын алуға бағытталды.
Дөңгелек үстел барысында тәртіп сақшылары киберқылмыстың ең көп таралған тәсілдеріне егжей-тегжейлі тоқталды. Атап айтқанда, SIM-картаның жарамдылық мерзімі аяқталды деген жалған хабарламалар, «сенім шоттарын» рәсімдеу туралы ұсыныстар, сондай-ақ күмәнді операциялардың алдын алу сылтауымен азаматтардың банктік деректеріне қол жеткізуге бағытталған алаяқтық әрекеттер туралы айтылды.

Әсіресе, жеке деректерді қорғау және цифрлық қауіпсіздіктің қарапайым ережелерін сақтау мәселелеріне баса назар аударылды. Қатысушыларға SMS-хабарламалардағы кодтарды, банк карталарының деректемелерін және өзге де құпия ақпаратты үшінші тұлғаларға бермеу, сондай-ақ бейтаныс адамдардың өтініші бойынша қашықтан қол жеткізу қосымшаларын орнатпау қажеттігі түсіндірілді. Сонымен қатар, үшінші тұлғаларға банктік шоттарды ұсынумен байланысты заңсыз схемаларға, яғни «дропперлікке» қатысудың тәуекелдері түсіндіріліп, мұндай әрекеттер үшін қылмыстық жауапкершілік көзделгені ескертілді. Бұған қоса, алаяқтық әрекеттерді анықтау және күмәнді қоңыраулар мен хабарламалар түскен жағдайда әрекет ету алгоритмі бойынша практикалық ұсынымдар берілді. Барлық қатысушыларға профилактикалық мазмұндағы ақпараттық материалдар таратылды.

Ұйымдастырушылар мұндай кездесулердің жүйелі түрде өткізілуі азаматтардың құқықтық санасын қалыптастыруға, киберсауаттылық деңгейін арттыруға, сондай-ақ ақпараттық технологияларды пайдалану арқылы жасалатын қылмыстардың санын азайтуға мүмкіндік беретінін айтты.
Көліктегі ПД киберқылмысқа қарсы іс-қимыл бөлімінің бастығы Руслан Құрмановтың айтуынша, цифрлық технологиялардың қарқынды дамуы жағдайында азаматтар жоғары қырағылық танытып, бейтаныс адамдардан келіп түскен кез келген ақпаратқа қырағылықпен қараулары шарт.
Көлік полицейлері азаматтарды сақтық шараларын сақтауға және алаяқтардың айласына алданып қалмауға шақырады. Өз қауіпсіздігіне мұқият қарау ғана ақша қаражатын жоғалтудан және жеке деректерді қорғаудан сақтайды.