Көлік полицейлері бес күн ішінде 16 есірткі құқықбұзушылығын анықтады: «Дәрмек» ЖПІШ қорытындысы

Ағымдағы жылдың 30 наурызы мен 3 сәуірі аралығында Көліктегі полиция департаментінің қызмет көрсету аумағында «Дәрмек» жедел-профилактикалық іс-шарасы өткізілді. Аталған іс-шара есірткі құралдарының, психотроптық заттардың заңсыз айналымына байланысты құқықбұзушылықтарды анықтау мен жолын кесуге, сондай-ақ прекурсорлардың заңды айналымын бақылауға бағытталған.

Көліктегі ПД есірткі қылмысына қарсы іс-қимыл басқармасының бастығы Фараби Елубаев атап өткендей, мұндай іс-шараларды өткізу есірткінің заңсыз айналымы фактілерін де, сондай-ақ бақылаудағы заттардың айналымы саласындағы бұзушылықтарды да тиімді анықтауға мүмкіндік береді. Ол бұл операцияның кешенді сипатқа ие екенін және тек қылмыстық әрекеттердің жолын кесуге ғана емес, сонымен қатар прекурсорлардың заңды айналымына бақылауды күшейтуге бағытталғанын айтты.

Іс-шара аясында көлік полицейлері кең ауқымды тексеру жұмыстарын жүргізді. Олар прекурсорларды, химиялық заттарды және зертханалық жабдықтарды тасымалдаумен айналысатын көлік-логистикалық компанияларды, сондай-ақ өндірістік қызметте прекурсорларды пайдаланатын кәсіпорындар мен ұйымдарды қамтыды.

ЖПІШ қорытындысы бойынша 16 қылмыстық құқықбұзушылық тіркелді, оның ішінде: 2 есірткі заттарын өткізу фактісі, 1 аса ірі мөлшерде есірткі сақтау фактісі, 3 есірткі контрабандасы фактісі, сондай-ақ 10 есірткіге байланысты теріс қылық.

«Көліктегі ПД қызметкерлері мен оның аумақтық бөлімшелерінің үйлесімді және кәсіби жұмысының арқасында есірткінің заңсыз айналымына байланысты бірқатар ауыр құқықбұзушылықтардың дер кезінде жолы кесілді», – деді Ф. Елубаев.

Оның айтуынша, жүргізілген іс-шаралар барысында заңсыз айналымнан 5 келіден астам түрлі есірткі және психотроптық заттар, сондай-ақ 715 тоннадан астам прекурсор тәркіленді. Сонымен қатар, 10 дәріхана ұйымында, 28 медициналық мекемеде және 9 өнеркәсіп нысанында шаруашылық қызметте прекурсорларды пайдаланатын тексерулер жүргізілді.

Көліктегі ПД көлік нысандарында да, прекурсорлардың заңды айналымы саласында да бақылауды жүйелі түрде күшейтіп келеді. Бұл жұмыс тұрақты негізде жалғасатын болады.