Бақылау да, үлгі де: СҚО полицейлері «Таза Қазақстан» акциясына белсенді қатысуда

Солтүстік Қазақстан облысында полицейлер азаматтарды қабылдап, қызмет атқаратын әкімшілік ғимараттардың маңындағы аумақтарды кезекті рет тазартты. Кезекшілікке түспеген қызметкерлер мамыр таңын сенбіліктен бастады.

Полицейлердің «Таза Қазақстан» жалпыұлттық экологиялық акциясына қатысуы жан-жақты сипатқа ие. Жыл басынан бері табиғатты қорғау полициясының қызметкерлері кіретін мобильді жұмыс тобы қалдықтарды заңсыз орналастырудың 11 фактісін анықтады. Қазіргі уақытта оларды жою жұмыстары жүргізілуде.

Учаскелік полиция инспекторлары елді мекендерде абаттандыру қағидаларының сақталуын қадағалайды. Төрт ай ішінде облыс бойынша осы бағытта 6809 құқық бұзушылық анықталды, олардың шамамен әр үшіншісі Петропавлда тіркелген.

Полиция ғимараттарының аумағын санитарлық тазалауға ерекше көңіл бөле отырып, тәртіп сақшылары «Таза Қазақстан» акциясының басты идеясын атап өтеді: елдегі тазалық пен санитарлық әл-ауқат әр адамнан басталады.