Қызмет пен отбасы: СҚО-да полицейлерді тепе-теңдікті сақтауға үйретуде

Полициядағы қызмет толық берілу мен жауапкершілікті талап етеді. Алайда форма мен погонның артында отбасысы, балалары және өз уайымы бар адамдар тұр. Солтүстік Қазақстан облысында полиция департаментінің психологтары қызметкерлерге осы маңызды тепе-теңдікті сақтауға көмектесетін тренингтер циклін бастады.

Тренингтер тек тесттер мен тапсырмалардан тұрмайды, олар ашық диалог форматында өтеді. Әсіресе, көп жылдық тәжірибесі бар қызметкерлердің өмірлік тәжірибесі құнды — олар отбасындағы сенім мен өзара түсіністікті сақтауға көмектесетін тәсілдерімен бөліседі.

«Мен жасөспірім ұлымды ешқашан ұрыспаймын. Бір рет айқайласаң, ол өз мәселелерімен бөліскісі келмей қалады», — дейді қатысушылардың бірі.

«Қанша шаршасам да, үйдегі міндеттерден бас тартпаймын. Отбасы — бұл серіктестік», — деп атап өтті тағы бір қызметкер.

Психологтар қатысушыларға отбасының рөлін жаңаша бағалауға, бір-бірін тыңдай білуге және қарым-қатынасты материалдық құндылықтармен алмастырмауға үйретеді. Олардың айтуынша, берік отбасының негізі — назар мен қолдау.

Алғашқы тренингке СҚО ПД аппаратының, Петропавл қаласы полиция басқармасының және арнайы жедел әрекет ету жасағының қызметкерлері қатысты. Мұндай сабақтар тұрақты түрде өткізіледі.

Ведомствода атап өткендей, берік отбасы — қызметкерлерге жұмысты тиімді атқаруға және ішкі тұрақтылықты сақтауға көмектесетін сенімді тірек.