Төрт күн ішінде бірде-бір алаяқтық тіркелмеді: полицейлер СҚО-дағы мерекелік демалыс күндерінің қалай өткенін баяндады

Солтүстік Қазақстан облысы полиция департаментінің жедел басқару орталығының мәліметіне сәйкес, жаңа жылдың алғашқы күндерінде өңірде жедел жағдай тұрақты болып қалды. Барлығы мүліктік сипаттағы үш қылмыс тіркелді: екі ұрлық және бір көлік айдап әкету дерегі.

Сонымен қатар, полицияға алаяқтық фактілері бойынша бірде-бір өтініш түскен жоқ. Дегенмен, тәртіп сақшылары тағы да қырағылық таныту қажеттігін, ешкімге жеке деректерді, әсіресе sms арқылы келетін кодтарды хабарламау керектігін ескертеді.

Сондай-ақ, төрт күн ішінде «102» арнасына 448 өтініш келіп түсті. Оның 36-сы қоғамдық тәртіптің бұзылуына қатысты болды — негізінен пиротехникалық бұйымдарды қолданған жастар жөнінде хабарламалар түсті. Бұдан бөлек, тыныштықты бұзудың 32 дерегі тіркелді: олар пәтерлердегі шулы жиындарға, сондай-ақ түнгі уақытта қатты музыка қосып жүрген жүргізушілерге байланысты болды. Жаппай демалыс орындарында, қысқы қалашықтарда құқық бұзушылықтар тіркелген жоқ.