Бес солтүстікқазақстандық журналист ІІМ жобасына қатысқаны үшін полициядан марапат алды
Солтүстік Қазақстан облысы полиция департаментінде Ішкі істер министрлігінің жыл сайынғы «Погондағы журналист» жобасына қатысқан бұқаралық ақпарат құралдарының өкілдерін салтанатты түрде марапаттау рәсімі өтті. Биыл жобаға төрт журналист пен бір бейнеоператор қатысты.
«Qazaqstan Media» желілік басылымының шеф-редакторы Светлана Дроздецкая жоба аясында қалалық патрульдік полиция батальонының қызметімен танысты. Толық арнайы киім мен жарық шағылыстыратын жилет киіп, экипаж құрамында кезекшілікке шығып, облыс орталығындағы жол және қоғамдық қауіпсіздікті қамтамасыз ету жұмысына тікелей қатысты. Нәтижесінде әлеуметтік желі қолданушылары мен оқырмандар арасында кеңінен талқыланған reels форматындағы бейнематериалдар мен жарияланым жарық көрді.
«Qazaqstan» Ұлттық телеарнасының тілшісі Эльмира Кәленова мен тәжірибелі бейнеоператор Ерлан Калиев алты сағаттан астам уақыт бойы, көбіне ашық аспан астында, СҚО ПД жедел-криминалистикалық басқармасының қызметі туралы мазмұнды телесюжет түсіріп, әзірледі. Қылмыстық-техникалық қызметтің қыр-сырына терең үңілген журналистер оның ерекшеліктерін жан-жақты зерделеді, ал Эльмира Кәленова бір күн бойы полиция офицерінің формасында жұмыс істеді.
Осы басқарманың қызметі туралы аналитикалық элементтері бар дәстүрлі газет материалын «7152.kz» қалалық сайтының тілшісі Александра Рудина дайындады. Әріптестері сияқты ол да сарапшылардың жұмысына терең бойлап, тіпті саусақ іздерін алу рәсіміне жеке өзі қатысты.
«Sm1.kz» жаңалықтар порталының журналисі Анастасия Харламова танымдық әрі жылы лонгридті фоторепортаж форматында жариялады. Ол күні бойы учаскелік полиция инспекторымен бірге Петропавл теміржол вокзалы маңындағы аула-ауланы, пәтер-пәтерді аралау жұмыстарына қатысты. Анастасия тек әсер жинап, материал кейіпкерлерін іздеумен шектелмей, полиция формасында зейнеткерлермен интернет-алаяқтықтан қорғану жолдары туралы әңгімелесіп, профилактикалық жадынамалар таратты. Мұның барлығы мазмұнды әрі шынайы жарияланымда көрініс тапты.
БАҚ өкілдерін құттықтаған СҚО полиция департаментінің бастығы, полиция генерал-майоры Айдын Қабдұлдинов биылғы өңірлік жоба жай ғана кәсіби тәжірибе емес екенін атап өтті. Оның айтуынша, жоба журналистерге полиция қызметін ішінен көріп, жауапкершілік пен тәртіпті, күнделікті еңбектің мәнін сезінуге мүмкіндік берсе, ал полиция қызметкерлеріне өз жұмысына қоғам көзімен қарауға жол ашты.
«Мұнда жеңімпаз да, жеңілген де жоқ. Әрбір журналист пен бейнеоператордың еңбегі бірінші орынға лайық», — деді ведомство басшысы.
Іс-шара барысында барлық қатысушыларға облыстық және қалалық полиция бөлімшелері басшыларының қол соғуымен алғыс хаттар мен бағалы сыйлықтар табысталды. Журналистер өз кезегінде жобаға қатысу мүмкіндігі мен оның жоғары деңгейде ұйымдастырылғаны үшін алғыстарын білдірді. Солтүстік Қазақстан облысы полиция департаменті «Заң мен Тәртіп» тұжырымдамасын нығайту аясында бұқаралық ақпарат құралдары және блогерлермен конструктивті ынтымақтастыққа әрдайым ашық.