Ауа райы құбылмалы болады — СҚО-да полицейлер мен «Қазгидромет» мамандары жүргізушілерді ескертеді

Полицейлер республикалық мемлекеттік кәсіпорын «Қазгидромет» мамандарымен бірлесіп, Солтүстік Қазақстан облысы аумағында ауа райының өзгеруі мүмкін екенін жүргізушілерге алдын ала хабарлайды.

«Қазгидромет» деректеріне сәйкес, алдағы демалыс күндері ауа температурасы нөл градусқа дейін жылынады. Бұл аралас жауын-шашынға, көктайғақтың пайда болуына, жекелеген аумақтарда боран соғуына әкелуі мүмкін.

Өңірдің құбылмалы климаты жүргізушілерден жолда ерекше мұқияттықты талап етеді. Полицейлер болжамды ескеруге, көлік құралдарының техникалық жай-күйін қадағалауға, жол қозғалысы ережелерін қатаң сақтауға шақырады.

Көктайғақ кезінде және көріну қабілеті төмендеген жағдайда жылдамдықты барынша төмендету, көліктер арасындағы қашықтықты сақтау, күрт жеделдету мен тежемеден аулақ болу аса маңызды.

11 ай ішінде СҚО-да 542 жол-көлік оқиғасы тіркелді, салдарынан 47 адам қаза тауып, 710 адам жарақат алды. Республикалық маңызы бар автожолдарда 104 жол апаты орын алып, 26 адам қаза тауып, 173 адам жарақаттанды. Осыған байланысты патрульдік полиция қызметкерлері мен «Қазгидромет» мамандары ең алдымен қалааралық жолға шыққан жүргізушілерге жүгінеді.

Қоғамдық қауіпсіздікті қамтамасыз етуге мүдделі барлық қызметтердің бірлескен жұмысы — «Заң және Тәртіп» қағидатын іске асырудың маңызды бөлігі.