СҚО полицейлері оқушылардың жолдағы қауіпсіздігін арттыруға бағытталған жаңа жобаны іске қосты

Түнгі уақытта оқушылардың жолдағы қауіпсіздігін қамтамасыз ету мақсатында Петропавл қаласындағы №2 мектептің басшылығымен және ата-аналар белсенділерімен кездесу өтті. Осы жиында оқушылардың сырт киіміне жарық шағылыстырғыш белгілерді міндетті түрде тағу жөніндегі пилоттық жоба басталды.

СҚО полиция департаменті Әкімшілік полиция басқармасының бастығы Серік Әлжановтың айтуынша, жоба идеясы оның бастауыш сыныпта оқитын ұлымен байланысты туындаған. Бір күні ұлы әкесіне қоңырау шалып, жолдан өткізіп жіберуді өтінген, себебі көліктер жылдам жүріп, оны байқамай өткен.

Сол күні полиция полковнигі Әлжанов балаларға жарық шағылыстырғыш белгілер – фликерлер сатып алып, пилоттық жобаны әзірлеуге кірісті. Жоба аясында мектептерге ата-аналарға осы қарапайым әрі тиімді құралды міндетті түрде қолдану ұсынылды.

Смағұл Сәдуақасұлы атындағы №2 мектеп таңдалған, себебі мұнда оқушылар арасында жол жүру ережелерін үйрету бағдарламасы сәтті жүзеге асырылып келеді. Полицейлер ата-аналар белсенділеріне түнгі уақытта жүргізушілердің жаяу жүргіншілерді байқауы қиын екенін көрсететін бейнематериалдарды ұсынды. Кейін екі оқушы мен фонарьдың көмегімен жарық шағылыстырғыш белгілердің тиімділігін тәжірибе жүзінде көрсетті.

Мектептің ата-аналар қауымы мен қамқоршылық кеңесі жобаны бірауыздан қолдады. Олар ата-аналар арасында түсіндіру жұмыстарын өздері жүргізбек. СҚО полиция департаменті мен мектеп дирекциясы арасында тиісті меморандумға қол қойылды. Енді 1-ден 8-сыныпқа дейінгі барлық оқушылар фликерлерді міндетті түрде тағады. Пилоттық жобаның нәтижелері кейін өңірдің барлық мектептерінде енгізілмек.