Жыл басынан бері СҚО полицейлері 770 келіден астам есірткіні тәркіледі

Солтүстік Қазақстан облысы Полиция департаменті бастығының бірінші орынбасары Асқар Мұхаметқалиевтің айтуынша, жұмыс екі негізгі бағытқа шоғырланған: есірткі қылмыстарын анықтау және олардың алдын алу.

Өткен жылдың сәйкес кезеңімен салыстырғанда есірткіге қатысты құқықбұзушылықтардың саны айтарлықтай өскен — 9 айда 214 дерек тіркелген (өткен жылы – 187). Оның ішінде 100-ден астамы — сату фактілері, 8 — аса ірі көлемде сақтау, 7 — контрабанда, 4 — есірткі насихаты бойынша анықталған.

Полиция қызметкерлері сондай-ақ 10 фитонарколабораторияның қызметін тоқтатып, шамамен 800 келі есірткі құралдарын тәркілеген. Оның ішінде 5 келіге жуық синтетикалық есірткі және 700 келіден астам марихуана бар.

Маңыздысы — құқық қорғаушылар облысқа есірткі жеткізудің 7 арнасын анықтап, жолын кесті. Мәселен, 7 сәуірде қалаға кіреберісте «Daewoo Nexia» автокөлігі тоқтатылып, оны басқарған 26 жастағы астаналық тұрғыннан жарты келіге жуық синтетикалық есірткі табылды. Сот оны 7 жылға бас бостандығынан айыру жазасына кесті.

Жастарды есірткіге тәуелділік пен есірткі қылмыстарына тартудың алдын алу жұмыстары мемлекеттік органдар мен қоғам өкілдерімен бірлесе жүргізілуде. 40 мыңнан астам жасөспірім мен студент 700-ден астам ақпараттық, спорттық және креативті іс-шараларға қатысты.

Асқар Мұхаметқалиев «Заң және Тәртіп» тұжырымдамасын іске асыру аясында мемлекеттік құрылымдар, белсенділер мен еріктілердің күш-жігерін біріктірудің маңыздылығын атап өтті. Тек ортақ күшпен ғана есірткі таралуының жолын тоқтатып, елдің болашағын қорғауға болады.