Солтүстік Қазақстанда полицейлер екі апта ішінде жаяу жүргіншілердің өміріне қауіп төндірген 100-ден астам жүргізушіні жауапқа тартты

Солтүстік Қазақстан облысында жаяу жүргіншілердің қауіпсіздігі полиция назарындағы басты мәселелердің бірі болып қала береді. Статистикаға сәйкес, жол-көлік оқиғаларының шамамен әр үшіншісі жаяу жүргіншіні қағумен байланысты. Осыған байланысты тәртіп сақшылары мектептерде тұрақты түрде түсіндіру жұмыстарын жүргізіп, жол апаттарының алдын алу үшін рейдтік іс-шаралар ұйымдастырады.

Соңғы екі апта ішінде облыс жолдарында полицейлер жүргізушілердің жаяу жүргіншілерге жол бермеуінің 133 дерегін анықтады. Ал осы кезеңде жаяу жүргіншілердің өздері 552 мәрте жол қозғалысы ережелерін бұзған. Полиция өкілдері жаяу жүргіншілерге қауіп төндірмеуді, тек белгіленген жерден және бағдаршамның рұқсат беретін белгісі жанғанда ғана жолды кесіп өтуді қатаң ескертеді. Бұл әсіресе балаларға қатысты.

Сонымен бірге, жол апаттарын талдау көрсеткендей, көп жағдайда кінәлілер – жүргізушілер. 15–30 қыркүйек аралығында «Қауіпсіз жол» жедел-алдын алу іс-шарасы шеңберінде жол-көлік оқиғаларының алдын алу жұмыстары күшейтілді.

Осы уақыт аралығында полицейлер 3700-ден астам түрлі жол ережесін бұзушылықты анықтады. Ең жиі кездесетіндері – қауіпсіздік белдігін тақпау және көлік жүргізу кезінде телефон пайдалану. Сонымен қатар, 48 мас жүргізуші ұсталды.

Полицейлер атап өтеді: жолдағы қауіпсіздіктің басты кепілі – барлық қатысушылардың тәртібі мен жол ережелеріне жауапкершілікпен қарауы. Бұл «Заң және Тәртіп» қағидатын жүзеге асырудың негізгі шарты болып табылады.