СКО полицейлері жолдардағы адам өлімінің негізгі себептерін атады

Солтүстік Қазақстан облысында 8 айдың ішінде 28 адам жол-көлік оқиғаларынан көз жұмды. Апаттылықты азайту мақсатында полицейлер 15-30 қыркүйек аралығында «Қауіпсіз жол» жедел-профилактикалық іс-шарасын өткізуде. Патрульдік полицияның нарядтары күшейтіліп, автоматты бейнетіркеу құралдары, соның ішінде жасырын патрульдеу белсенді қолданылуда.

Іс-шараның алғашқы күнінде жол қозғалысы ережелерінің 249 түрлі бұзушылығы анықталды. Оның ішінде қауіпсіздік белдігін тақпау – 48 дерек. Сонымен қатар, 12 жүргізуші жаяу жүргіншілерге жол бермеген, 8 жүргізуші маневр жасау ережесін бұзған. Жол-көлік оқиғаларына жасалған талдау бойынша, бұл – жолдағы адам өлімінің негізгі себептерінің бірі. Жыл басынан бері маневр жасау ережесін бұзу 11 адамның өмірін қиды.

Ерекше назар республикалық маңызы бар трассалардағы қозғалыс қауіпсіздігіне аударылуда. Өңірдегі өліммен аяқталған жол апаттарының жартысынан астамы дәл осы жолдарда тіркелген – 17 адам қаза тапты. Полицейлер тек ереже бұзушылықтарды анықтап қана қоймай, профилактикалық түсіндіру жұмыстарын жүргізіп, жылдамдықты асырмау, шаршаған күйде көлік жүргізбеу қажеттігін ескертіп жатыр.

Полицейлер жаяу жүргіншілерге де арнайы үндеу жасады. Қаңтардан бері СҚО-да 362 жол-көлік оқиғасы тіркелсе, оның 103-і – жаяу жүргіншілерді қағу деректері. Нәтижесінде 6 адам қаза тауып, 100 адам жарақат алды. Тәртіп сақшылары тұрғындарды жолды тек белгіленген жерден ғана кесіп өтуге шақырады. Міндетті түрде жүргізушінің сізді көріп, өткізіп тұрғанына көз жеткізу қажет. Жолды кесіп өткенде капюшон киіп, құлаққап тағудың өте қауіпті екендігін ескертеді.

Жолдағы қауіпсіздік – баршаның ортақ ісі, деп атап өтеді полицейлер. Тек өз міндеттеріне жауапкершілікпен қарау, Заң мен Тәртіпке құрметпен қарау арқылы ғана өмір мен денсаулықты сақтауға болады.