Ауаны ластаған автобустар анықталды - СҚО-да полицейлер мен экологтардың бірлескен рейді

Солтүстік Қазақстан облысында дизель отынымен жүретін қоғамдық көліктердің түтін шығару нормаларын бұзу деректерін анықтау бойынша полицейлер мен экологтар бірлескен рейдтерін жалғастыруда.

Петропавл қаласындағы қалалық бағыттардың соңғы аялдамаларында арнайы құрылғылардың көмегімен рейдке шыққан топ өкілдері өлшеу жұмыстарын жүргізуде. Қоршаған ортаға зиян келтіретін заңбұзушылықтар анықталған жағдайда, автобус иелеріне қатысты әкімшілік хаттамалар толтырылады.

Аталған жұмыс 21 шілдеде басталған республикалық «Тасымалдаушы» жедел-алдын алу іс-шарасы аясында жүргізіліп жатыр. Іс-шара жолаушылар тасымалының қауіпсіздігін арттыруға, жол қозғалысына қатысушылардың тәртібін күшейтуге және жол-көлік оқиғаларының алдын алуға бағытталған.

Бір күн ішінде экологиялық талаптарға сәйкес келмейтін автобустарды маршрутқа шығарғаны үшін екі жауапты тұлға әкімшілік жауапкершілікке тартылды. Сонымен қатар, жол қозғалысы ережелерінің сақталуына да ерекше назар аударылып отыр.