Петропавлда 5 миллион теңге көлемінде екі алаяқтық дерегі бойынша күдікті ұсталды

Полицияға Петропавл қаласының 67 жастағы тұрғынынан алаяқтық фактісі бойынша өтініш түсті. Зейнеткер бұрыннан белгілі алдау схемасына алданып қалған.

Оған үй телефонына қоңырау шалып, жылаған әйел адамның дауысы өзін Ресейде тұратын қызы ретінде таныстырып, жол апатына ұшырағанын, адвокатқа ақша қажет екенін айтқан.

Сол сәтте оның ұялы телефонына өзін адвокатпын деп таныстырған алаяқ қоңырау шалып, зейнеткердің үрейін пайдаланып, қолындағы 2 миллион теңге көлеміндегі ақшаны такси жүргізушісі арқылы беруін сұраған. Сонымен қатар, «адвокат» зейнеткерге байланыс үзілмес үшін телефонды өшірмей, үйде қалдыруды бұйырған.

Кейін жылаған дауыс қайта хабарласып, «операцияға» ақша сұраған. «Адвокат» әңгіме үзілмеуін талап етіп отырғанымен, жәбірленуші байланыс үзіп, немересіне хабарласқан. Немересінен ешқандай апат болмағанын естіген әйел 102 арнасына хабарласып, алаяқтардың құрбаны болғанын түсінген.

Жедел-іздестіру іс-шараларының нәтижесінде полицейлер такси жүргізушісінен 2 миллион теңге алған «дроппер» — яғни алаяқтық схеманың қатысушысы болып табылатын күдіктіні ұстады. Ол – 24 жастағы қала тұрғыны болып шықты. Тәртіп сақшылары оның тағы бір осындай алаяқтық фактісіне қатысы барын анықтады. Аталған жағдайда 88 жастағы петропавлдық 3 миллион теңгесінен айырылған.

Қазіргі уақытта тергеу амалдары жүргізіліп жатыр. Күдіктіге ірі көлемде айыппұлдан бастап 4 жылға дейін бас бостандығынан айыру жазасы қарастырылған.