СҚО жолдарына қосымша «ақылды» бейнекамералар орнатылды

Петропавл жүргізушілері жол ережесін бұзуды автоматты түрде фото және бейне тіркеу жүйелерінің тиімділігін жақсы біледі. Мұндай жүйелер орнатылған жол айрықтарында ауыр зардаптары бар бірде-бір жол-көлік оқиғасы тіркелмеген. Апаттылықты талдау мен азаматтардың өтініштеріне сүйене отырып, полицейлер бұл жүйелерді қала маңындағы жолдарға да енгізу жұмыстарын жалғастыруда.

Бүгінде СҚО-да 67 «интеллектуалды» бейнебақылау аппараттық-бағдарламалық кешені жұмыс істейді. 10 маусымнан бастап қозғалыс қарқыны жоғары Қызылжар ауданының шеткі аймақтарында тағы 5 жаңа құрылғы іске қосылды. Олар «Жезқазған – Петропавл» трассасындағы Бескөл мен Бәйтерек ауылдарының негізгі кіреберістерінде, «Астана – Петропавл» жолындағы «Altiro» кафесінің маңында және «Челябі – Новосібір» трассасындағы Белое ауылының негізгі кіреберісінде орнатылған.

Бұдан бөлек, «ҚазАвтоЖол» ҰК» АҚ «Ақылы автомобиль жолдары дирекциясы» филиалы «Көкшетау – Петропавл» автожолында Бескөл, Астраханка және Драгомировка ауылдарының маңындағы аркаларға жылдамдықты автоматты өлшеу құралдарын орнатты.

Жүргізіліп жатқан жұмыстың мақсаты – өңір жолдарындағы апаттар санын азайту. Биылғы жылдың басынан бері Солтүстік Қазақстанда 184 жол-көлік оқиғасы тіркеліп, 7 адам қаза тауып, 256 адам жарақат алды. Полицейлер жүргізушілерден жол жүру ережелерін қатаң сақтауды сұрайды.