Полиция: 5 айда 40 кг есірткі тәркіленді, жеткізу арналары жабылды
Солтүстік Қазақстан облысының полиция департаменті есірткі қылмысына қарсы күрес пен алдын алу шараларын белсенді түрде жалғастыруда. Полиция департаменті бастығының бірінші орынбасары, полиция полковнигі Асқар Мұхаметқалиев 2025 жылдың алғашқы бес айының негізгі нәтижелерін ұсынды.
Аталған кезеңде 139 есірткіге қатысты құқық бұзушылық тіркелді, бұл өткен жылдың сәйкес кезеңімен салыстырғанда едәуір көп (110). Оның ішінде 87 қылмыс анықталды, оның 66-сы сату фактілері, 5-і аса ірі көлемде сақтау, 3-і контрабанда, 2-і есірткіні насихаттау және 2-і ұйымдасқан қылмыстық топты құру фактілері.
Заңсыз айналымнан 40 килограмнан астам есірткі заттары тәркіленді. Олардың ішінде 3,5 кг-нан астам синтетикалық есірткі, 33 кг марихуана, 3 кг қарасора, сондай-ақ гашиш, каннабис шайыры және трамадол бар.
СҚО полициясы алты жергілікті тұрғыннан құралған ұйымдасқан қылмыстық топтың қызметін тоқтатты. Олар елдің оңтүстігінен өсімдік тектес есірткі жеткізуді ұйымдастырған. Нәтижесінде 20 кг марихуана тәркіленді. Үй жағдайында ұйымдастырылған 9 фитонаркозертхана жойылды.
«Анализ көрсеткендей, СҚО-ға синтетикалық есірткілер басқа өңірлерден, негізінен Астана, Алматы қалаларынан, Ақмола және Павлодар облыстарынан «тасымалдаушылар» арқылы жеткізіледі. Қабылданған шаралар нәтижесінде синтетикалық есірткі жеткізудің 4 арнасы жабылды. Мысалы, 2025 жылдың 7 сәуірінде «Оңтүстік» бекетінде 26 жастағы ер адам басқарған «Daewoo Nexia» көлігі тоқтатылды. Тінту барысында шамамен 500 грамм синтетикалық есірткі және 100 грамм каннабис шайыры тәркіленді. Күдікті ер адам республикалық интернет-дүкен үшін синтетикалық есірткі тасымалдаушысы ретінде әрекет еткен. Қылмыстық іс қозғалды, күдікті қамауға алынды», — деп атап өтті Асқар Мұхаметқалиев.
Есірткіге қарсы күрестің маңызды бағыты — нашақорлықтың алдын алу. Бес ай ішінде 420-дан астам алдын алу іс-шаралары өткізілді, оның ішінде 55 акция, 218 дәріс, 28 дөңгелек үстел, 20 спорттық және мәдени іс-шаралар. Бұл шаралармен мектептер, колледждер мен жоғары оқу орындарының 25 мыңнан астам оқушысы мен студенті қамтылды. Ақпараттық жұмыс та белсенді жүргізілуде: есірткі сату бойынша ұсталғандар туралы 18 материал жарияланды, 7 сот үкімі жария етілді, БАҚ пен әлеуметтік желілерде 45 алдын алу жарияланымдары жарық көрді.
Алдағы уақытта полиция синтетикалық есірткілерге қарсы күресті күшейтуді, ұйымдасқан қылмыстық желілерді анықтауды, жастар арасында алдын алу жұмыстарын арттыруды және есірткі өнімдерін таратуға арналған цифрлық арналарды бұғаттауды жалғастырады.
Полиция департаменті азаматтық қоғам, еріктілер және барлық мүдделі құрылымдарға қолдау көрсеткені үшін алғыс білдіреді. Тек бірлескен күш-жігермен ғана есірткінің таралуын тоқтатып, өңіріміздің болашағын сақтап қалуға болады.