Қазақстан халқының бірлігі күні орай СҚО полиция департаментінің музейінде мерекелік іс-шара өтті. Онда ішкі істер органдарының ардагері, Солтүстік Қазақстан облыстық Әзірбайжан мәдениеті орталығының төрағасы Чингиз Курбанов сөз сөйледі. Өз ұлтын мысалға келтіре отырып, Солтүстік Қазақстан жерінде 100-ден астам ұлт өкілдері бейбітшілік пен келісімде қалай өмір сүріп жатқанын айтып берді.
Айта кету қажет, СҚО полиция департаментінің бөліністерінде 20-дан астам ұлт өкілдері қызмет атқаруда. Оларды заң мен тәртіпке қызмет етудің ортақ мақсаты біріктіреді. Қызметтегі жоғары көрсеткіштері үшін бірқатар қызметкер мерекеге орай алғыс хаттармен марапатталды.
Олардың арасында мемлекеттік тілді жақсы меңгерген, Бірлік күні қарсаңында ұйымдастырылған байқаулардың лауреаттары бар. Мәселен, жуырда Тайынша ауданы полиция бөлімі көші-қон қызметі тобының аға инспекторы Николай Михневич «Мемлекеттік тіл – бірліктің негізі» республикалық іс-шарасында ішкі істер министрі орынбасарының қолынан алғыс хат алды.
Сондай-ақ, ПД музейінде жас қызметкерлерді толеранттылыққа тәрбиелеуде және ұлтаралық қатынастарды нығайтуда баға жетпес көмегі үшін Чингиз Курбанов марапатталды.
СҚО ПД музейінің меңгерушісі Любовь Осинская қонақтарға Ұлы Отан соғысы жылдарына арналған залда экскурсия өткізді. Келе жатқан Жеңістің мерейтойы – кез келген сынаққа төтеп беруге күш беретін бірліктің ұлы құндылығының айқын дәлелі.
Солтүстік Қазақстан облысында апаттылықты азайту үшін жолдарды тарылту әдісі алғаш рет қолданыла бастады. Әлемдік тәжірибе көрсеткендей, жолды тарылту жүргізушілердің қырағылығын арттырады, қауіпті болса алда келе жатқан көлікті басып озудан және жылдамдықты арттырудан бас тартуға мәжбүрлейді.
Жыл басынан облыста 103 жол-көлік оқиғасы тіркелді, 5 адам қаза тауып, 145 адам жарақат алды. Жезқазған – Петропавл тас жолының әуежайға бұрылыс алдындағы учаскесі – қозғалысы қарқынды учаскелердің бірі. Бүгін мұнда жүргізушілердің назарын аударып, жылдамдықты төмендету үшін арнайы кедергілер орнатылды.
Апаттылықты азайтуға бағытталған бұл шара жүргізушілер тарапынан сұрақтар туындатып отырғандықтан, полиция қызметкерлері бұл акцияның мәнін түсіндіруді қолға алды. Мұндай алдын алу шаралары алдағы уақытта да өткізілетін болады. Жүргізушілер осындай жұмыстарға түсіністікпен қарайтындықтарын айтты.
Сонымен қатар, полицейлер жолдарда бақылауды күшейтуде. Дрондар, жасырын патрульдеу, бейнебақылау – мұның барлығы қайғылы оқиғаларды болдырмау үшін қолданылады. Жол қозғалысына қатысушылардың мұқияттылығы мен жауапкершілігі – жолдағы қауіпсіздіктің басты кепілі.
Петропавлда полицейлер «Динамо» стадионында ашық аспан астында түнемек болған ер адамды байқап қалды. Тексере келе, ол қаңғыбас емес, облыс орталығында адасып кеткен Австриядан келген 46 жастағы саяхатшы болып шықты.
СҚО ПД көші-қон қызметі басқармасының қызметкерлері Аарон Арьяның шын мәнінде Қазақстан Республикасына заңды негізде келгеніне көз жеткізді. Ол елордаға Түркиядан ұшып келіп, Петропавлға жол-жөнекей кетіп бара жатқан көліктермен жеткен. Тәртіп сақшылары оны қонақ үйге орналастырды.
Аарон Арья — бұрынғы кеңестік республикалардың бірінің тумасы, орыс тілінде жақсы сөйлейді. Әлемді аралап, елдерге саяхаттап жүргеніне бірнеше жыл болған. Оны ауылдық жердің тыныс-тіршілігі қызықтырады екен. Қазіргі уақытта Орталық Азия елдерімен танысуды жоспарлап отыр.
Ол Қазақстанға алғаш рет келіп отыр. Полицияның көрсеткен көмегіне дән риза. Ол қайтадан жолға шығып, өзіне көмектескен полицейлерге алғысын білдірді.
Петропавл маңындағы Тепличное ауылы су тасқынына байланысты қауіпті учаскелердің бірі саналады. Мұнда құтқарушылармен бірге 50 полиция қызметкері екі ауысыммен тәулік бойы кезекшілік атқаруда. 5 автопатруль, 2 автобус және вахталық көлік дайын күйде тұр.
Полиция қызметкерлері қоғамдық тәртіп пен жол қауіпсіздігін қамтамасыз етуде. Бұл – бөгетті нығайтуға тартылған ауыр техниканың көптігін ескерсек, өте өзекті мәселе.
Ауылдың кейбір тұрғындары уақытша көшірілген. Құқық қорғау органдары олардың мүлкінің қауіпсіздігін тәулік бойы қадағалап отыр.
Қажет болған жағдайда, төтенше жағдай қызметкерлері ауылда қалған тұрғындарды қауіпсіз жерге дереу эвакуациялауға дайын. Полиция қызметкерлері ауыл тұрғындарымен үнемі байланыста, шұғыл көшуге дайын болу қажеттігін түсіндіруде.
Әр көшеге тәжірибелі полицейлер бекітілген. Олар арнайы құрылған WhatsApp чаттары арқылы тұрғындармен күндіз де, түнде де байланыс ұстап отыр.
29 сәуір кешіндегі жағдай бойынша Тепличное ауылындағы ахуал тұрақты.
Солтүстік Қазақстан облысында «Жасөспірім» жедел-профилактикалық іс-шарасы жалғасуда, оның шеңберінде полицейлер профилактикалық жұмысты жүргізіп қана қоймай, көмекке мұқтаж отбасыларға да қолдау көрсетуде.
Жуырда СҚО ПД көші-қон қызметі басқармасының қызметкерлері Қазақстан халқы Ассамблеясының мүшесі болып табылатын «Тәжіктердің республикалық этномәдени орталығы» РҚБ-ның Солтүстік Қазақстан облысындағы филиалының өкілдерімен Петропавлдағы көп балалы отбасыға барып қайтты. Қайырымдылық бастамасы этномәдени бірлестіктің жетекшісі Убайдулло Раджабовтың қолдауымен іске асырылды.
Барлық төрт балаға – 4 және 7 сынып оқушыларына, сондай-ақ мектеп жасына дейінгі қыз балаға жаңа спорттық киім және аяқ киім әкеліп берді. Бұдан бөлек, акцияны ұйымдастырушылар отбасын жемістермен қуантты.
Полиция қызметкерлерінің айтуынша, спортқа баулу – өскелең ұрпақтың бойында тәртіп пен жауапкершілікті тәрбиелеудің маңызды құрамдас бөлігі. Көп балалы отбасылар мен қиын өмірлік жағдайға тап болғандарға көмек көрсету аймақтағы полиция мен қоғамдық ұйымдардың әлеуметтік жұмысының маңызды бөлігі болып табылады.
Көктемгі Есіл өзенінің тасуына байланысты Петропавл қаласының Заречный шағынауданы судың қоршауында қалды. Уақытша оқшаулануға қарамастан, төтенше қызметтер жергілікті тұрғындарға көмектерін үздіксіз көрсетіп жатыр.
28 сәуір кешке Заречный ауылының егде жастағы тұрғынына медициналық көмек қажет болды. Әйел сол қолында ауырсыну сезіп, дәрігерлерге жүгінген. Белгілі болғандай, ол алдыңғы күні үй жануарларын судан құтқармақ болып, мысықтарының бірінен жарақат алған.
№13 орта мектеп ғимаратының жанында медицина қызметкерлері алғашқы медициналық көмек көрсетті. Одан кейін, Петропавл қалалық полиция басқармасының моторлы қайығы арқылы әйел адам гидроторап өткеліндегі көпірге жеткізілді. Онда оны жедел жәрдем көлігі күтіп тұрған еді.
Жергілікті атқарушы органдардың, құтқарушылар мен полиция қызметкерлерінің үйлесімді іс-қимылы арқасында әйел қауіпсіз жерге уақытылы жеткізіліп, қажетті көмек көрсетілді.
Петропавл қалалық полиция басқармасының мәліметінше, Заречный шағынауданындағы жағдай тұрақты. Есіл өзенінің тасуына байланысты елді мекенге кіріп-шығу уақытша қиындағанымен, азаматтардың өмірі мен денсаулығына қауіп жоқ.
Қоғамдық тәртіпті сақтау мақсатында Заречныйда 30 полиция қызметкері кезекшілік атқаруда, екі моторлы қайық пен патрульдік автокөліктер жұмылдырылған. Эвакуация қажет болған жағдайда құтқарушылар, әскерилер, әкімдік пен коммуналдық қызмет өкілдері дайын тұр. Бұған қосымша, су тасқыны аумағына апаратын бағыттарда тағы 40 полиция қызметкері тәулік бойы кезекшілік етуде.
«Балаңызды арнайы ұстау құрылғысымен тасымалдап келе жатырсыз ба? Дұрыс. Қауіпсіздік белдігін тағуды және көлік жүргізу кезінде ұялы телефон пайдалануға болмайтынын ұмытпаңыз», – дейді патрульдік полиция батальонының қызметкері көлік жүргізушісіне СҚО жолында.
19 сәуірден бастап өңірде «Қауіпсіз жол» жедел-профилактикалық іс-шарасы өтіп жатыр. Қазіргі полицияның басты мақсаты – жүргізушілерді жазалау емес, құқық бұзушылықтардың алдын алу. Дегенмен, жүргізушілер көлік жүргізу кезінде телефонды жиі пайдаланады және қауіпсіздік белдігін тақпайды.
Полицейлер аса қауіпті құқық бұзушылықтарды анықтауға ерекше назар аударып отыр. Олардың қатарында – мас күйде көлік жүргізу, жаяу жүргіншіге жол бермеу, көшелер мен жол қиылыстарынан өту ережесін бұзу. Мәселен, 9 күн ішінде өңір жолдарында көлікті мас күйде жүргізудің 41 дерегі тіркелді. Әрбір осындай факті – ауыр салдармен аяқталатын жол-көлік оқиғасына әкеп соғуы мүмкін.
Іс-шараның мақсаты – жол қозғалысының барлық қатысушыларының тәртібін арттыру. Жол жүрісі қағидаларын мүлтіксіз сақтау ғана жолдардағы қауіпсіздікті қамтамасыз ете алады.
Петропавл қалалық полиция басқармасының қызметкерлері хабарлағандай, су тасқыны салдарынан сыртқы әлемнен оқшауланған Заречный шағынауданындағы жағдай тұрақты.
Жергілікті атқарушы органдар тұрғындарды уақытша орналастыру үшін орын дайындағанымен, көпшілігі аралға айналған елді мекенде қалуды жөн көрді. 28 сәуір кешкісіне дейін тұрғын үйлер мен мекемелердің су астында қалу фактілері тіркелген жоқ.
Қоғамдық тәртіпті сақтау үшін шағынауданда екі қызметтік автокөлігімен 30 полиция қызметкері тәулік бойы кезекшілік атқаруда. Сондай-ақ әскери қызметшілер, құтқарушылар, жергілікті атқарушы органдар мен коммуналдық қызметтердің өкілдері жұмылдырылды. Барлығы кез келген уақытта халыққа көмек көрсетуге және қалдырылған мүлікті қорғауға дайын.
Бұдан бөлек, су басу қаупі бар аумақтың айналасындағы бекеттерде тағы 40 полиция қызметкері кезекшілік етуде. Екі полиция қайығы да іске тартылған. Жағдай толық бақылауда.
Заречный кентіндегі су тасқынына қарсы жұмыс жүргізіліп жатқан аймақта әскери қызметшілер үйінділерді нығайту үшін қапшыққа құм салу кезінде қару ұңғылары құйылған үйдің ескі іргетасын тауып алды.
Осы учаскеде кезекшілік атқаратын полицейлер іргетасын сындырып, одан 46 мылтық ұңғысы мен аңшылық қарудың бөлшектерін алып шықты.
Тәртіп сақшылары оларды қаптарға салып, «кең жерге» қайықпен апарып, Петропавл қаласының полиция басқармасына жеткізді. Бетонды кім және қай жылдары ерекше тәсілмен шегендегенін — тексеру барысында анықтауға тура келеді.
СҚО Полиция департаментінде ПД аппараты мен Петропавл қаласы Полиция басқармасының қызметкерлері үшін ерекше сабақ өтті. Тәжірибелі маман, клиникалық психолог Резеда Баймухаметова қызметкерлерге зияткерлік ойын өткізді, оның барысында олар құмар ойындарына тәуелділіктің ерекшеліктері мен оның адам бойында бар-жоғын анықтауға болатын белгілері туралы білді.
Мысалы, егер адам «сырғанау» (ірі джекпот), «тильт» (ойын кезінде өзіне-өзі ие бола алмау), «ағызу» (жаппай ұтылу), «айналдыру» (ойын автоматында немесе сәттілік дөңгелегінде айналу, ойындағы раунд), «бонус» (ойын автоматтарындағы бонустық раунд) сөздерін қолданып сөйлесе, онда ол адамнан қауіптену керек.
Мінез-құлықтың өзгеруі, өз міндеттерін елемеуі, бұрынғы әуестенген ісіне қызығушылықтың болмауы, жиі-жиі қарызға ақша сұрау - бұл да адамға психологтың көмегі қажет болуы мүмкін екендігі туралы туыстары немесе басшыларына хабарлауға себеп болып табылады. Тәуелділіктің кез-келген түрі сияқты, тәуелді адам маманға неғұрлым ертерек жүгінсе, соғұрлым тез емделу ықтималдығы жоғары болады.
Зияткерлік сайыста қатысушылар дипломдармен марапатталды. Полицейлер жұмыс барысында әртүрлі адамдармен кездеседі. Сондықтан белгілі бір мінез-құлықтың туындау себептерін жақсы түсінуі керек. Бұл «Заң және тәртіп» қағидатын іске асыру шеңберінде профилактикалық жұмыстың тиімділігін арттырады. Осыған ұқсас сабақтарды болашақта да өткізу жоспарлануда.