Солтүстік Қазақстан облысында полицейлер синтетикалық есірткі сатты деген күдікпен Петропавл қаласының 25 жастағы тұрғынын ұстады. Ұстау кезінде одан мефедрон мен α-PvP салынған 3 ірі және 2 кіші орама тәркіленді. Бұдан бөлек, тұрғылықты жерінен құрамында α-PvP бар үш «зиплок» пакет (екі грамм) табылды. Алынған «синтетикалық» заттың жалпы салмағы 227 граммды құрады.
Медициналық куәландыру оның психостимуляторлар қолданғанын көрсетті. Күдікті тыйым салынған заттарды пайдаланатынын мойындады.
СҚО ПД Есірткі қылмысына қарсы іс-қимыл басқармасының деректеріне сәйкес, есірткі сатты деген күдікпен ұсталғандардың жартысы – өздері есірткі қолданады. Жыл басынан бері облыс аумағында есірткі саудасына қатысы бар деген күдікпен 29 адам ұсталды, оның 15-і есірткіге тәуелді.
Полицейлер жастарға «бір рет татып көр» дейтін таныстарынан аулақ жүру қажет екенін еске салады. Мұндай «қызығушылық» қылмыстық әрекетке әуестенуге, ұзақ уақыт бас бостандығынан айырылуға алып келуі мүмкін. Есірткі қылмысына қарсы күрес — «Заң және Тәртіп» қағидасын іске асырудағы ең өзекті бағыттардың бірі.
Солтүстік Қазақстан облысы Полиция департаменті жанындағы есірткі құқық бұзушылықтарының алдын алу кеңесінің мүшелері ҚР Ішкі істер министрінің бірінші орынбасары Бауыржан Әленовтың төрағалығымен өткен республикалық кеңес отырысына қатысты. Жиын бейнеконференция байланысы режимінде өтті. Онда жартыжылдықтың қорытындылары талқыланды.
Полиция генерал-майоры Бауыржан Әленов республикалық және өңірлік деңгейдегі кеңестердің жұмысын жоғары бағалап, олардың тиімділігін атап өтті. Жарты жылдың ішінде елімізде жастар арасында есірткіге қарсы иммунитетті қалыптастыруға бағытталған ондаған жарқын іс-шара өткізілді. Түсіндіру жұмыстарын жүргізуге арналған бейнематериалдар көптеп әзірленді. Осы орайда, СҚО полицейлерімен бірлесе түсірілген «Закладчики. Расплата» фильмі еліміздегі үздік деректі жобалардың қатарынан көрінді. Алты ай ішінде YouTube желісінде 1,5 миллионнан астам қаралым жинаған.
Бейнеконференция аяқталғаннан кейін СҚО ПД бастығының міндетін атқарушы, полиция полковнигі Асқар Мұхаметқалиев кеңестің белсенді мүшелеріне алғыс хаттар табыстады. Олардың арасында №17 Ұлттық жаңғыру мектебінің директоры Ляззат Жалмұқанова да бар. Ол ұйымдастырған ауқымды флешмоб пен спорттық мереке оқушылардың есінде қалды.
Полицейлердің айтуынша, есірткіге және есірткі қылмысына қарсы тиімді қорғаныс жүйесін тек азаматтық қоғаммен тығыз өзара іс-қимыл арқылы ғана құруға болады.
Солтүстік Қазақстан облысы Тимирязев ауданының полиция қызметкерлері аудан әкімдігі мен балалар мен жасөспірімдер спорт мектебі қызметкерлерімен бірлесіп, 2015-2016 жылы туған балалар арасында алғаш рет шағын футболдан ашық турнир ұйымдастырды. Тимирязевтік жасөспірімдерден бөлек, жарысқа Ғ. Мүсірепов, Тайынша және Қызылжар аудандарының командалары қатысты.
Тимирязев ауданындағы «Арлан» жабық хоккей кортында өткен турнир Қазақстан полициясы күніне арналды. Аудандық полиция бөлімінің бастығы полиция полковнигі Тілеген Әлжанов балаларды салауатты өмір салтымен қатар, белсенді азаматтық ұстанымды қолдауға шақырды.
– Сіздердің араларыңыздан ертең болашақ полицейлер, полковниктер, тіпті генералдар да шығуы мүмкін. Ең бастысы – Заң мен Тәртіпке құрметпен қарайтын патриот болыңыздар, – деді ол жас спортшыларға.
Тартысты өткен жарыста алаң иелері сенімді жеңіске жетіп, ақтық ойында 4:1 есебімен басым түсті. Екінші орынды Ғ. Мүсірепов атындағы ауданның командасы иеленсе, қызылжарлықтар үздік үштікті түйіндеді. Тайынша ауданының екі ойыншысы «Үздік қақпашы» және «Ең жақсы ойыншы» номинацияларын жеңіп алды. Жүлдегерлерге кубоктар, медальдар мен дипломдар табысталды.
Аудандық полиция бөлімінің кубогы үшін ашық турнирді жыл сайын өткізу жоспарланып отыр.
«Заң және Тәртіп» идеологиясын ілгерілету аясында полицейлер ішімдіктен бас тартуды белсенді насихаттауда. Мұның артықшылықтары айқын көрінуде: ішімдік ішпейтін ауылдарда ауыр және аса ауыр қылмыстар, сондай-ақ отбасылық-тұрмыстық құқық бұзушылықтар жасалмайды.
Бұл «жарияланбаған челлендж» 2022 жылы Тайынша ауданының Теңдік, Ғ. Мүсірепов атындағы ауданның Ковыльное, Айыртау ауданының Бірлестік пен Қарасай батыр ауылдарынан басталған еді. Содан бері облыста ішімдікке сұраныс жоқ ауылдар саны артып, спирттік өнімдерден бас тартқандар көбейіп келеді.
Биыл Қазақстан Республикасы ІІМ-де «Полиция заң мен тәртіп күзетінде» профилактика жылы деп жарияланды, облыста Уәлиханов, Тимирязев, Аққайың, Тайынша, Есіл, Ақжар, Жамбыл, М. Жұмабаев, Шал ақын, Ғ. Мүсірепов аудандарында 10-нан астам ауыл ішімдіктен бас тартты.
Жуырда, 26 маусымда, Ақжар ауданының Байтұс ауылында өткен жиында тұрғындар алкогольден бас тарту бастамасын қолдады. Осылайша, СҚО-да «ішімдіктен бас тартқан ауылдар» саны 19 елді мекенге дейін өсті.
Полицейлердің айтуынша, ішімдіксіз өмір — қылмыстың алдын алудағы және «Заң және Тәртіп» тұжырымдамасын жүзеге асырудағы маңызды факторлардың бірі.
Солтүстік Қазақстан облысы полиция департаментінде алғашқы погон табыстау рәсімі өтті. Учаскелік инспекторлар қызметі, тұрмыстық зорлық-зомбылыққа қарсы күрес бөлімшесі және қаржымен қамтамасыз ету басқармасынан үш жас қызметкеріне полиция лейтенанты шені берілді.
Бұдан бөлек, тоғыз қызметкерге полиция капитаны кезекті арнаулы шені берілді. СҚО ПД ұйымдасқан қылмысқа қарсы күрес басқармасы құрамындағы бөлім бастығы, ЖҚАЖ және Петропавл қ. ПБ бірінші полиция бөлімінің кезекші бөлімінің аға инспекторлары полиция майоры шеніне ие болды.
Полиция подполковнигі кезекті арнаулы шені есірткі қылмысына қарсы іс-қимыл басқармасының бастығы Руслан Үмбетовке берілді.
СҚО ПД бастығының орынбасары, полиция полковнигі Абылғазы Габдуллин мен ПД және Ұлттық ұлан ардагерлер кеңесінің төрағасы Ақан Сыздықов офицерлерге ақ жол тілеп, Отанға адал қызмет етуді жалғастыруға шақырды.
29 маусым таңертең Петропавл қаласының 20 жастағы тұрғыны Қарғалы аралындағы демалыс базасы маңында адасып қалған. Кейін ол жүкті құрбысына шақырылған жедел жәрдем көлігін күтіп алуға шыққанын, қатты уайымдап, қобалжығаннан жолынан жаңылып қалғанын айтып түсіндірді. Адасып кеткенін түсінген соң, полицияға қоңырау шалған.
Қоңырауды Қызылжар ауданы полиция бөлімінің кезекші қызметкері қабылдады. Петропавл қ. полиция басқармасы патрульдік полиция батальонының жақын маңда жүрген экипаждары бірден бойжеткен болуы мүмкін деген бағытқа қарай бағдарланды.
Орман алқабы мен Пестрое көлі жағалауын тексеру барысында полиция аға лейтенанты Бейбіт Кереев пен полиция лейтенанты Анатолий Божко көмек сұраған айқай естиді. Киімі малмандай су, тоңған қыз аралда қалып қойған. Бейбіт Кереев суға түсіп, өткел тауып, қызды қауіпсіз жерге алып шықты.
Құқық қорғау органдары азаматтарды табиғат аясында қауіпсіздік шараларын сақтауға, ұялы телефондарын өздерімен бірге алып жүруге шақырады. Осындай жағдайларда геолокация қосылған «102» мобильді қосымшасының пайдасы болуы мүмкін.
Азаматтардың құқықтық сауаттылықтарын арттыру - Солтүстік Қазақстан облысы полиция департаментінің көші-қон қызметі басқармасының қызметкерлері осы мақсатта «ATAZAN_AZAMAT_KZ» атты ауқымды челленджге қатысты.
Челлендж аясында полицейлер халықты құжаттандыру бойынша атқаратын жұмыстың барлық қыр-сырын көрсетті. СҚО ПД бастығы Айдын Қабдұлдинов 16 жасқа толған солтүстікқазақстандық жасөспірімдерге жеке куәліктерін табыстады. Ол жастарды «Заң және тәртіп» тұжырымдамасы аясында белсенді өмірлік ұстанымды ұстануға шақырды. Осындай іс- шаралар аудандарда да өткізілді. Оған жергілікті атқарушы органдар, түрлі мемлекеттік құрылымдар мен жастар ұйымдары қатысты.
Сондай-ақ құжатын онлайн-форматта рәсімдеген Петропавл қ. тұрғыны жеке куәлігін генерал-майор Айдын Қабдұлдиновтың қолынан алды. Бұл қызмет E-gov порталының «Жеке кабинетінде» қолжетімді және ұялы телефоны бар кез келген ҚР азаматына қолжетімді.
Мүгедектігі бар азаматтарға жеке куәлік үйлеріне барып ресімделеді. Ол үшін 1414 бірыңғай call-орталығына хабарласу қажет. Челлендж аясында полицейлер 91 жастағы зейнеткерге жеке куәлік табыстау сәтін БАҚ-та жариялады. Сондай-ақ тәртіп сақшылары №2 түзеу мектебіне барып, 16 жасқа толған тәрбиеленушілерге де құжаттарын табыстады.
Жыл басынан бері СҚО полицейлері жеке басын куәландыратын құжаттары жоқ 27 адамды анықтап, құжаттандырды. Осы жұмыстардың бірі БАҚ-та кеңінен жарияланды: СҚО ПД көші-қон қызметі басқармасының бастығы Ермек Нұсырбаев әлеуметтік бейімдеу орталығында тұратын 46 жастағы петропавлдыққа өміріндегі алғашқы жеке құжатын табыстады.
СҚО ПД қызметкерлері челлендж эстафетасын Павлодар облысындағы әріптестерінен қабылдап, оны Шығыс Қазақстан облысына жолдады.
Әлеуметтік желілердегі cолтүстікқазақстандық пабликтерде полиция қызметкерлері ұлттық музыкалық аспаппен сүйемелдей отырып, қазақтың халық әндерін орындаған бейнеролик тарады. Құқық қорғау органдарының өкілдері Ұлттық домбыра күнін атап осылайша өтті.
Қазақ халқының ұлттық дәстүрлері мен бай мәдени мұрасына құрмет көрсету мақсатында, 29 маусым күні СҚО полиция департаменті мен Петропавл қ. полиция басқармасының қызметкерлері ДП-нің акт залында музыкалық концерт ұйымдастырды. Іс-шараға 30 полиция қызметкері қатысты.
Қатысушылардың басым бөлігі департаменттің мәдени орталығының құрамында, олар кезекшіліктен бос уақыттарында барлық маңызды іс-шараларға белсенді түрде атсалысады. Ал біреулері үшін домбыра – сүйікті хобби. Мысалы, отбасылық-тұрмыстық зорлық-зомбылыққа қарсы күрес бөлімшесінің қызметкері, полиция лейтенанты Раушан Баймұқанова әріптестеріне «Көздеріңе ғашықпын» атты әсерлі композицияны орындады.
Мұндай іс-шараларға қатысу жас қызметкерлерді патриоттылыққа тәрбиелеуге ықпал етеді және полиция мен қоғам арасындағы тығыз байланысты көрсетеді.
Қазақстан полициясы күніне арналған салтанатты іс-шарадан кейін Солтүстік Қазақстан облысының полиция департаментінде жұмысшы мамандықтардың өкілдері марапатталды.
"Қызмет" мемлекеттік, банк мекемелері мен қоғамдық қызмет көрсету қызметкерлерінің салалық кәсіподағының Солтүстік Қазақстан облыстық филиалының төрағасы Темірғали Әбілмәжінов СҚО ПД-да жұмыс істейтін кәсіподақ мүшелеріне Құрмет грамоталарын табыс етті.
Марапат алғандардың тізімінде қызметтік үй-жайларды жинастырушы Светлана Яшина, Майрагүл Саржанова, Светлана Торгашева, газ-электр дәнекерлеуші Григорий Лемьев, СҚО ПД автошаруашылығының жүргізушісі Сергей Кабанец бар. Сондай-ақ, Құрмет грамотасы СҚО ПД тәрбие және кадр жұмысы басқармасының инспекторы Жұпар Күрлеуітоваға да табысталды.
Темірғали Әбілмәжінов атап өткендей, полиция - қылмысқа қарсы күрестің майданы болса, жұмысшы мамандықтардың өкілдері Заң мен тәртіп күзетінде тұрған маңызды қызметтің көрінбейтін бөлігі.
Полицейлер 26 маусымда атап өтілетін Халықаралық нашақорлыққа қарсы күрес күні қарсаңында «Есірткіге жол жоқ!» ұранымен Петропавл көшелерінде жаппай жүгіру ұйымдастырды.
Салауатты өмір салтын ұстанатын түрлі жастағы 300-ден астам қалалық 3 шақырым қашықтықты жүріп өтті. Мәре сызығына алғашқы болып жеткен 50 жеңімпаз үшін СҚО ПД есірткі қылмысына қарсы іс-қимыл басқармасының қызметкерлері ұтыс лотереясын өткізді. Олар естелік сыйлықтарға ие болды. Барлық қатысушыларға грамоталар мен медальдар табыс етілді. Жарыс облыстық әкімдіктің спорт басқармасы және «Болашақ» корпоративтік қорымен бірлесіп ұйымдастырылды.
Ал, 26 маусымда Петропавлдың басты алаңында мерекелік концерт өтті. Оның ашылуында СҚО ПД бастығының міндетін атқарушы полиция полковнигі Асқар Мұхаметқалиев есірткі қаупімен күресу үшін қоғамды біріктірудің маңыздылығын атап өтті.
Ашық аспан астында қала тұрғындары таңғажайып от шашуды, ЖҚАЖ жауынгерлері мен қызметтік-іздестіру иттерінің түрлі қырларын, жас әртістердің вокалдық нөмірлері мен бишілердің мың бұралған билерін тамашалады. Есірткіге қарсы күреспен айналысатындардың ұдайы түрде өткізетін әсерлі, тартымды іс-шаралары жастарды салауатты өмір салтын ұстануға шақыруға, «Заң мен тәртіп» тұжырымдамасын іске асыру шеңберінде қоғамды біріктіруге бағытталған.