Шымкентте полицейлер сенбілік жұмыстарын жүргізді

Шымкент қаласы Полиция департаментінде сенбі күні кең ауқымды сенбілік өтті. Іс-шараға қызметтік міндетінен бос барлық жеке құрам жұмылдырылып, тәртіп сақшылары бірлесіп тазалық жұмыстарын жүргізді.

Таңғы уақыттан бастап полицейлер қызметтік киімдерін жұмыс киіміне алмастырып, қажетті құрал-жабдықтарды алып, аумақтарды абаттандыруға кірісті. Олар департаменттің әкімшілік ғимараттары мен аудандық полиция бөлімшелерінің айналасын ретке келтіріп, қоқыстардан тазартып, санитарлық жағдайын жақсартты.

Сонымен қатар, департамент басшылығы ғимарат маңына ағаш көшеттерін отырғызып, көгалдандыру жұмыстарына ерекше көңіл бөлді. Бұл бастама қоршаған ортаны көркейтуге және қаланың экологиялық ахуалын жақсартуға бағытталды.

Аталған сенбілік «Таза Қазақстан» республикалық акциясы аясында ұйымдастырылып, табиғатты қорғау, тазалықты сақтау және экологиялық мәдениетті қалыптастыру мақсаттарын көздейді.

Мұндай іс-шаралар тек аумақты тазалаумен шектелмейді. Бұл – әр азаматтың қоршаған ортаға деген жауапкершілігін арттырып, қоғамда ұқыптылық пен тәртіп қағидаларын нығайтатын маңызды қадам. Сонымен қатар, ортақ іске жұмылу арқылы ұжымдық бірлік пен өзара қолдау мәдениеті де арта түседі.