Құқығы жоқ, дулығасыз, мас күйде: Павлодар облысында мотоциклист ұсталды

Жылы күндердің келуімен өңір жолдарына екі дөңгелекті көлік жүргізушілері жаппай шықты. Өкінішке қарай, олардың көпшілігі үшін «драйв» заң талаптарына қайшы келуде. Полиция жылдамдықпен жарысудан бастап мас күйде көлік жүргізуге дейінгі өрескел бұзушылықтарды тіркеуде.
Ақтоғай ауданының бір ауылында кезекшілік кезінде полицейлер жолдағы әрекеті күмән тудырған мотоциклисті тоқтатты. Тексеру барысында ер адамның бірқатар заң бұзушылыққа жол бергені анықталды: ол мас күйде болған, медициналық куәландыру оның орташа дәрежеде мас екенін растады. Сонымен қатар оның жүргізуші куәлігі болмаған және ол мотодулығасыз жүрген.
Тәртіп бұзушы енді ауыл тұрғындарына қауіп төндірмейді: оған қатысты әкімшілік хаттама толтырылып, мотоциклі арнайы тұраққа қойылды. Енді оған заңда көзделген қатаң жаза қолданылады.
Маңыздысы: мотоцикл — жоғары қауіпті көлік құралы. Дулығаны елемеу, жылдамдық режимін бұзу, әсіресе мас күйде рөлге отыру «темір тұлпарды» қайғылы жағдайға айналдыруы мүмкін.
— Жағдайды әрдайым байыппен бағалаңыз. Есіңізде болсын: жол қателікті кешірмейді, ал қауіпсіздігіңіз — өз қолыңызда, — деп ескертеді Павлодар облысының ПД қызметкерлері.
Айта кетейік,жыл басынан бері мас күйінде көлік басқарғаны үшін барлығы 382 жүргізуші жауапкершілікке тартылды, оның ішінде соңғы тәулікте – 7 адам.