Болашақ қорғауда: Екібастұз полицейлері жастарды ерлікке жігерлендіруде

Екібастұз қаласындағы №36 мектеп-лицейінде болашақ Отан қорғаушылар мен олардың тәлімгерлерін құрметтеуге арналған салтанатты іс-шара өтті. Кездесудің құрметті қонағы ретінде қала Полиция басқармасының бастығы, полиция полковнигі Төлеген Құдайбергенов қатысты. Ол мектеп ұжымын, оқушыларды және «Жас сақшы» жасағының мүшелерін келе жатқан мерекемен жылы құттықтады.
Өз сөзінде полковник патриоттық тәрбие — тәртіпті, жауапты және Отанын шын сүйетін ұрпақ қалыптастыратын берік негіз екенін атап өтті.
Салтанатты шараның ерекше сәттерінің бірі — Ербол Сембаев атындағы кадет сыныбының жетекшісі Жақсылық Искаковты марапаттау болды. Жастар тәрбиесіне қосқан өлшеусіз үлесі үшін оған Павлодар облысы Полиция департаменті бастығының атынан естелік сағат табысталды.
«Жас сақшы» жасағының тәрбиеленушілері де назардан тыс қалмады. Ең үздік қатысушыларға Екібастұз қаласы Полиция басқармасының алғыс хаттары табыс етілді. Марапатқа оқу мен қоғамдық өмірде ерекше батылдық, табандылық және жауапкершілік танытқан оқушылар ие болды.
Осындай кездесулер жастардың патриоттық рухын нығайтып қана қоймай, құқық қорғау органдарындағы қызметтің беделін айқын көрсетіп, ел болашағының берік негізін қалыптастырады.