Екібастұздық учаскелік инспектор балалары бар екі көлікті батпақтан құтқарды

Павлодар облысының полицейлері өз істерімен дәлелдеп келеді: олардың жұмысы тек хаттама толтырумен шектелмей, қиын сәттерде нақты көмек көрсету. Жақында Екібастұз қалалық полиция басқармасының учаскелік инспекторы Талғат Қожамжаров Тұз көлінің маңында екі отбасы үшін нағыз құтқарушыға айналды.

Патрульдеу кезінде полицей жағалау маңындағы батпаққа батып қалған көліктерді байқайды. Кейін белгілі болғандай, Daewoo Nexia жүргізушісі суға жақынырақ бармақ болып, көлігі батпаққа кіріп кеткен. Сол сәтте көлік ішінде жүргізушінің жұбайы мен 3 және 5 жастағы екі кішкентай бала болған. Оларға көмекке келген досы Chevrolet Niva көлігімен жеткенімен, ол да қалың батпақтан шыға алмай қалған.

Учаскелік инспектор бұл жағдайға бейжай қарамай, дереу әрекет етті. Жағдайды бағалай отырып, Талғат Қожамжаров арнайы құралдарды қолданып, екі көлікті де қауіпсіз жерге шығарып алды. Кейін қосымша ақаулардың алдын алу үшін отбасыларды қалаға дейін шығарып салды.

Өз күштерімен шыға алмай, үмітін үзген жүргізушілер полицейге шынайы алғыстарын білдірді.
– Біздің басты міндетіміз — қажет кезде қасында болу. Қиын жағдайға тап болған әрбір адамға көмектесуге әрдайым дайынбыз, – дейді полиция капитаны Талғат Қожамжаров.