Цифрлық иммунитет: Екібастұз жастарына интернеттегі тұзақтарды қалай тануды үйретуде

Екібастұзда интернет қауіпсіздігіне арналған дәріс өтті: жергілікті колледж студенттері киберқылмыс саласының сарапшыларымен кездесті. Жастар алдында киберполиция қызметкерлері мен Павлодар облысының киберқауіпсіздік жөніндегі өңірлік жобасының үйлестірушілері сөз сөйледі.
Кездесудің басты тақырыбы — дропперлік. Мамандар банк картасын «жалға беру» немесе күмәнді ақша аударымдарына көмектесу оңай табыс емес, керісінше қылмыстық схемаға тікелей қатысу екенін түсіндірді. Мұндай әрекеттер үшін қылмыстық жауапкершілік қарастырылған.
– Біз нақты мысалдар арқылы фишингтің не екенін, жалған сілтемелерге қалай алданбау керектігін, неге шынайы қызметкерлер ешқашан жеке деректерді сұрамайтынын, сондай-ақ тиімді ұсыныс болып көрінетін алаяқты қалай тануға болатынын түсіндірдік. Бүгінде цифрлық сауаттылық — бұл тек смартфонды пайдалану емес, өзіңді және ресурстарыңды қорғау қабілеті, – деді криминалдық полиция бөлімінің кіші жедел уәкілі Әділ Мұханов.
Кездесу ашық диалог форматында өтті. Студенттер тек дәріс тыңдап қана қоймай, нақты жағдайларды талқылап, манипуляцияларды анықтауды үйренді және интернет-алаяқтардан қорғану жолдарын ұсынды: банк карталарын ешкімге бермеу, күмәнді сілтемелерді елемеу және жеке әрі банктік деректердің құпиялығын сақтау.