Павлодар облысында аса ірі мөлшерде есірткі заттары тәркіленді

Павлодар облысы прокуратурасының үйлестіруімен ұйымдасқан қылмысқа қарсы күрес басқармасының жедел қызметкерлері жүргізген арнайы жедел іс-шаралар кешені нәтижесінде Ақсу қаласында ер адам ұсталды.

– Тінту барысында күдіктіден ірі көлемде өсімдік тектес есірткі заттары, шамамен 11 кг., табылып тәркіленді. Аталған дерек бойынша есірткі құралдарын, психотроптық заттарды, олардың аналогтарын заңсыз иемдену, сақтау, тасымалдау, өткізу мақсатында жөнелту не өткізу фактісі бойынша қылмыстық іс қозғалды. Сот санкциясымен күдікті қамауға алынды, – деп хабарлады Павлодар облысы ПД ҰҚҚКБ бастығы Ғабит Қабдрахманов.

Ведомство заңсыз есірткі айналымына қарсы күресте көмектесетін кез келген ақпаратты 102 нөмірі арқылы немесе «Police 102» мобильді қосымшасы арқылы хабарлауға шақырады. Анонимділікке кепілдік беріледі.