Дропперлер жауапқа тартылады
Полиция департаменті дропперлік фактілері бойынша қылмыстық істерді тергеп жатыр. Барлық күдіктілер анықталып, ұсталды. Қазіргі уақытта тергеу органдары қажетті процессуалдық іс-шараларды жүргізуде.
Бүгінде интернет-алаяқтық көбіне «жеңіл табыс» деген желеумен жасырын түрде ұсынылады. Бұл қылмыстық схемадағы ең қауіпті буындардың бірі — дропперлер. Олар банк карталарын, төлем деректерін заңсыз береді немесе қылмыстық жолмен алынған ақшаны аудару мен қолма-қол ақшаға айналдыруға қатысады. Дәл осы дропперлер арқылы алаяқтар ұрланған қаражатты шығарып, өздері көлеңкеде қалады.
Полиция өкілдерінің айтуынша, «тәжірибесіз-ақ оңай табыс» туралы хабарландырулар әлеуметтік желілерде, мессенджерлерде, тіпті таныстар арқылы таралады. Уәде етілген сыйақының артында қылмыстық жауапкершілік жасырынып жатады. Әр адам банк картасымен жасалған барлық операцияларға карта кімнің атына рәсімделсе, сол жауап беретінін түсінуі тиіс. Қаражатты басқа біреу аударса да, жауапкершілік шот иесіне жүктеледі.
Мұндай схемаларға көбіне жастар мен тұрақты табысы жоқ азаматтар тартылып, салдарын толық ұғынбайды. Дегенмен, рөліне қарамастан, шот иесі оның реквизиттерін алаяқтық мақсатта пайдаланғаны үшін жауапты болады.
2025 жылдан бастап дропперлік үшін қылмыстық жауапкершілік енгізілді. Бұл шара ақпараттық жүйелерді пайдалана отырып жасалатын қылмыстармен күреске бағытталған, – деді киберқылмыстарға қарсы іс-қимыл басқармасының бастығы Асхат Абетжанов.
Мәселен, Павлодар қаласында 18 жастағы жұмыссыз азамат материалдық сыйақы үшін өз банк шотына белгісіз тұлғаға заңсыз қолжетімділік берген. Оның әрекеттерінің салдарынан алаяқтар бір азаматты шамамен 1 млн теңгеге алдаған.
29 жастағы ауыл тұрғынының әрекеттерінен азаматтар 5 млн теңгеден айырылды. Ол да тек онлайн байланысқан «танысына» банк картасына қолжетімділікті заңсыз берген.
Қарағанды қаласының студенті өткен жылдың қаңтар айында Павлодарда жүрген кезінде өз банк шотын алаяқтарға беріп, «қызметі» үшін сыйақы алған.
– Қазіргі таңда дропперлер қылмыстық процестің аясында. Әрқайсысы қолданыстағы заңнамаға сәйкес жауап береді, – деп атап өтті полиция ведомствосында.
Сонымен қатар, құқық қорғау органдары қатаң ескертеді:
•банк реквизиттерін, интернет-банкингті немесе мобильді қосымшаны үшінші тұлғаларға бермеңіз;
•күмәнді сілтемелерге өтпеңіз және тексерілмеген қосымшаларды орнатпаңыз;
•шотыңызға қолжетімділік беру арқылы ұсынылатын кез келген «жеңіл табыс» — қылмыстық жауапкершілікке әкеп соғады;
•алаяқтарға өз шотыңызға қолжетімділік беру — қылмыс болып саналады.