Павлодар облысында алимент төлеуден жалтарып жүрген 247 борышкер анықталды

- Павлодар облысы Полиция департаменті алимент төлемейтін борышкерлердің жүрген жерін анықтау жұмыстарына ерекше көңіл бөлуде. Кәмелетке толмаған балаларының алдындағы алименттік қарызы бар тұлғаларды анықтау және ұстау мақсатында тұрақты түрде рейдтік іс-шаралар өткізіліп келеді. 2025 жылдың қорытындысы бойынша полиция қызметкерлері алимент төлемеген 247 борышкерді анықтады, – деп хабарлайды Павлодар облысы ПД.

Алимент төлемейтіндер тек ер адамдар ғана емес. Өз балаларының тағдырына бейжай қарайтын жауапсыз аналар да бар. Мәселен, полиция қызметкерлері 2021 жылдың желтоқсан айынан бері өз баласына 4 млн 450 мың теңге көлемінде алимент қарызы жиналған, облыс орталығының 25 жастағы тұрғынының жүрген жерін анықтады. Ол бұрын іздеуде болған.

Полицияда өткен жылы жүргізілген жедел-іздестіру іс-шаралары нәтижесінде алимент бойынша қарызы бар азаматтарға тиесілі 41 автокөлік анықталғанын атап өтті. Барлық автокөліктер арнайы айып тұрағына қойылды. Сонымен қатар, алимент бойынша борышкерлердің көлік құралдары туралы мәліметтер «Кибершериф» және «Мерген» автоматтандырылған жүйелеріне енгізіледі.

Анықтама үшін: борышкерді іздестіруге негіз ретінде соттың жауапкерді іздестіру туралы ұйғарымы алынады және ол іздеудегі тұлғаның емес, талапкердің тұрғылықты жері бойынша полиция органдарында тіркеледі.

Айта кету керек, борышкердің жүрген жерін анықтау – бұл алимент қарызын өндіріп алу дегенді білдірмейді. Полицияның өкілеттігі іздеуде жүрген тұлғаның орналасқан жерін анықтап, оны сот орындаушысына келуге міндеттеумен шектеледі. Алиментті өндіру сот органдары арқылы жүзеге асырылады.

Егер көші-қон қызметі бір ай ішінде алимент борышкерінің орналасқан жерін анықтай алмаса, талапкердің өтініші негізінде тиісті құжат беріледі. Осы құжаттың негізінде борышкерді іздестіру кезеңінде балаларды асырауға арналған уақытша жәрдемақыны әлеуметтік қамсыздандыру органдары төлейді.