Павлодарлық полицейлер марапатталды

Қазақстан полициясының 33 жылдығына арналған салтанатты шара Павлодар облысы Полиция департаментінде өтті. Іс-шараға ішкі істер органдарының ардагерлері, құқық қорғау органдарының басшылары, қызметтік міндетін атқару кезінде қаза тапқан полицейлердің туыстары мен жеке құрам қатысты.

Шара басында ҚР Ішкі істер министрі Ержан Сәденовтің құттықтау жеделхаты оқылды.

Құқық қорғау қызметкерлерін Павлодар облысы әкімінің міндетін атқарушы Серік Батырғожинов құттықтап сөз сөйледі:
– Сіздер – «Заң және тәртіп» қағидатының шынайы жолбасшыларысыздар. Қоғамдағы қауіпсіздік пен тәртіпті қамтамасыз ету жолында аянбай еңбек етудесіздер. Сіздердің кәсібиліктеріңіздің арқасында қоғамда тұрақтылық қалыптасып, азаматтардың құқық қорғау органдарына деген сенімі артып келеді, – деді Серік Барлыбайұлы, әскери қызметтері, жедел әрекеті мен кәсіби шеберліктері үшін алғыс білдіре отырып.

Полиция ардагерлерін және жеке құрамды Полиция департаментінің бастығы Василий Скляр да құттықтап, сөз сөйледі:
– Кәсібилік, заң алдында бәрінің теңдігі мен азаматтарға құрмет – біздің табысымыздың негізі. Әрқайсыңыздың еңбектеріңіздің арқасында бүгінгі күні полиция – еліміздің азаматтары үшін сенім мен қауіпсіздіктің символына айналды. Әрқайсыңызға зор денсаулық пен құқықтық тәртіп пен тұрақтылықты қамтамасыз ету жолында табыс тілеймін. Ардагерлерге де алғысымды білдіремін – олар жас қызметкерлерге кәсіби шеберлік сырларын меңгеруге көмектесіп келеді.

Қазақстан Республикасы Премьер-Министрінің өкімімен полицей Алмаз Жакипов марапатталды. Облыс әкімінің өкімімен 11 полицей марапатталып, олардың арасында ардагерлер Баян Мағзұмова мен Кенжібек Сүлейменов бар.

Ішкі істер министрінің бұйрығымен адал қызметі, жоғары көрсеткіштері мен Полиция күніне орай Олжас Теміровке “полиция полковнигі”, Ризагүл Андасоваға “полиция капитаны” атағы мерзімінен бұрын берілді.

«Құқық тәртібін қамтамасыз етуге қосқан үлесі үшін» медалімен Абылай Игберлинов пен Асхат Махметов марапатталды.
«Ішкі істер органдарының үздігі» төсбелгісімен Әсел Байтокина, Нұрлан Маканов және Берік Әбілденов марапатталды.

Ішкі істер органдарында көп жылдық мінсіз қызметі мен құқықтық тәртіпті қамтамасыз етуге қосқан үлесі үшін Департамент бастығының өкімімен 20 ардагер және 112 полицей өз марапаттарына ие болды.

Мерекелік концерттен кейін полицейлер өздеріне жүктелген міндеттерді орындауды жалғастырды.