Ақтауда «Сауатты бол» жобасы аясында өңірлік жастар жиыны өтті
Ақтау қаласында Маңғыстау облысы жастар саясаты мәселелері жөніндегі басқармасының ұйымдастыруымен «Заң мен тәртіп» идеясын ілгерілету мақсатында «Сауатты бол» өңірлік жастар жиыны өтті.
Жиынның басты мақсаты – жастардың құқықтық, қаржылық, діни, медиа, мәдени және цифрлық сауаттылығын арттыру.
Іс-шара барысында қатысушыларға төрт бағыт бойынша ақпарат ұсынылды:
- Мәдени сауаттылық: «Қазақстан КВН одағы» республикалық жастар қоғамдық бірлестігінің президенті Есен Елеукен сөз сөйлеп, жастарға шығармашылық пен мәдени белсенділіктің маңыздылығын түсіндірді.
- Қаржылық сауаттылық: ҚР Парламенті Мәжілісінің депутаты Дәулет Мұқаев жастарға қаржыны дұрыс жоспарлау, артық шығыннан сақтану, несие алудағы маңызды ережелер және өз болашағын саналы түрде басқару жолдары туралы кеңестер берді.
- Құқықтық сауаттылық: Маңғыстау облысы прокурорының орынбасары Сәкен Самет «Заң мен тәртіп» қағидаты аясында жастардың өз құқықтарын білуі және оларды заң шеңберінде қорғау жолдарын түсіндірді.
- Цифрлық және интернет сауаттылық: Киберқылмысқа қарсы іс-қимыл басқармасының жедел уәкілі Құралбек Ғайбуллаев жеке деректерді қорғау, әлеуметтік желілердегі жауапкершілік пен заң талаптарын сақтау жөнінде нақты мысалдар келтірді.
Дәулет Мұқаев жиынның ашық әрі еркін форматта өткенін атап өтті:
«Жастар өз ойын ашық айтуы және өзгелердің пікірін құрметтей білуі керек. Осындай кездесулер олардың ой-өрісін кеңейтіп, қоғамда белсенді әрі жауапты азамат болып қалыптасуына көмектеседі. Бүгінде жастардың көпшілігі қаржыны дұрыс жоспарламай, қиындықтарға тап болады. Сондықтан табысты тиімді бөлу, артық шығыннан сақтану және несие алу кезінде нені ескеру керектігін білу өте маңызды. Қаржылық сауатты адам өз болашағын алдын ала ойлайды және кез келген жағдайда дұрыс шешім қабылдай алады».
Жиын жастарға өз мүмкіндіктерін кеңейтуге, құқықтық және қаржылық сауаттылығын арттыруға, сондай-ақ саналы әрі жауапты азамат болып қалыптасуға мүмкіндік беретін маңызды алаң болды.
https://www.instagram.com/reel/DSMrPyzCihS/?utm_source=ig_web_copy_link&igsh=MzRlODBiNWFlZA==