Маңғыстау облысында балаларға арналған қауіпсіздік бойынша профилактикалық іс-шара өтті

Маңғыстау облысы полиция департаментінің қызметкерлері жол қозғалысы қауіпсіздігі мен тұрмыстық қауіпсіздікті арттыру мақсатында балаларға арналған танымдық-профилактикалық іс-шара өткізді. Бұл туралы Polisia.kz хабарлайды.

Іс-шараға 2 жастан 10 жасқа дейінгі шамамен 50 бала қатысып, үлкен қызығушылық танытты. Шара қуыршақ театрында ұйымдастырылып, балаларға жол қозғалысы ережелері мен қауіпсіздік негіздері ойын және театрландырылған форматта түсіндірілді.

Аниматор кейіпкерлер балаларды бағдаршам белгілерімен, жолдан қауіпсіз өту тәртібімен және жаяу жүргіншілер өткелінен өту ережелерімен таныстырды. Интерактивті ойындар барысында балалар жол қозғалысы ережелерін оңай меңгеріп, алған білімдерін бекітті.

Сонымен қатар іс-шара аясында қимыл-қозғалысқа негізделген және танымдық ойындар өткізілді. Балалар қойылған сұрақтарға белсенді жауап беріп, жол қауіпсіздігі бойынша пайдалы ақпарат алды.

Бұдан бөлек, қуыршақ театры сахнасында өрт сөндірушілердің қызметіне арналған арнайы қойылым көрсетілді. Спектакль барысында тұрмыстық қауіпсіздік мәселелері қозғалып, сіріңке мен оттықпен ойнаудың қауіптілігі, сондай-ақ өрт қауіпсіздігі ережелерін сақтау қажеттілігі көрнекі түрде түсіндірілді.

Іс-шараның негізгі мақсаты — балалардың бойында қауіпсіздік мәдениетін қалыптастыру, жол қозғалысы ережелерін ерте жастан сақтауға үйрету және төтенше жағдайлардың алдын алу. Мұндай профилактикалық және тәрбиелік іс-шаралар алдағы уақытта тұрақты түрде өткізілетін болады.