«Біз есірткіге қарсымыз»: Қостанайда полиция мен тұрғындардың қатысуымен нашақорлыққа қарсы концерт өтті

26 маусым күні Сити-орталық сахнасында Халықаралық нашақорлықпен күрес күніне арналған кең ауқымды іс-шара өтті. Ұйымдастырушылар бұл күнге ерекше әрі мағыналы форматты таңдады. «Біз есірткіге қарсымыз» атты концерттік бағдарлама өнерді, спортты және профилактикалық бағытты біріктірді.

Қонақтарды өнерпаздар, арнайы жасақ пен кинологиялық қызмет орталығы қызметкерлерінің үйретілген иттермен көрсетілімдері күтті.

Іс-шараның жарқын сәттерінің бірі — «Мен есірткіге қарсымын» атты бейнебаян байқауының жеңімпаздарын марапаттау болды. Ұйымдастырушылардың айтуынша, бұл байқауға 20 мамыр мен 20 маусым аралығында облыс тұрғындарының ондаған өкілі қатысып, өздерінің бейжай еместігі мен шығармашылық қабілеттерін көрсетті.

Байқау жеңімпаздары:

1 орын — Айгелов Асанали Маратович

2 орын — Серикова Айлана Ербулановна

3 орын — Маганбетов Арман Жанбулатович

Сондай-ақ көрермендер кекушинкай каратэ мектебі мен ушу клубының жас спортшыларының өнерін тамашалады. Олар зиянды әдеттерге қарсы тұратын күш пен тәртіптің үлгісін көрсетті.

Қостанай облысы ПД Есірткі қылмысына қарсы іс-қимыл басқармасының аға жедел уәкілі Айгүл Ераділова былай деді:
«Есірткі тек денсаулыққа зиян емес — олар адамның арманын, болашағын, тіпті өмірін де құртады. Біз мұнда жастарға ескерту үшін келдік: бір ғана қате қадам тағдырды бұзуы мүмкін. Қысқа рахаттың елесін емес, өмірді таңдаңыздар».

Профилактика кеңесінің мүшесі Диана Тұяқбаева:
«Бүгінгі күні әр жасөспірім есірткіге "жоқ" деп айтудың — әлсіздік емес, керісінше күштің белгісі екенін білуі маңызды. Біздің мақсат — жастарға олардың таңдауы бар екенін жеткізу. Бұл таңдау өзіне, денсаулығына және болашағына саналы көзқараспен қараудан басталады».

Психолог Гүлсім Бисимбаева атап өтті:
«Егер достарыңыздың немесе таныстарыңыздың қиын жағдайға тап болғанын байқасаңыз — үнсіз қалмаңыз. Көмек сұрау немесе ересектерге айту — бұл сатқындық емес, батылдық. Кейде бір ауыз сөз біреудің өмірін құтқарып қалады».

Бұл шара — мәдениет, спорт және азаматтық белсенділік жастарды есірткіден қорғау жолында біріге алатынының жарқын дәлелі болды. Сахнадан айтылған басты ой: әр адам таза әрі салауатты өмірге құқылы.