Қарағанды облысында жол қауіпсіздігіне - цифрлық бақылау: дрондар мен автоматты жүйелер іске қосылды

Қарағанды облысында жол қауіпсіздігіне - цифрлық бақылау: дрондар мен автоматты жүйелер іске қосылды. Қарағанды облысының Полиция департаменті Патрульдік полиция батальоны жол-көлік оқиғаларының алдын алу және апаттылық деңгейін төмендету бағытында бақылау шараларын күшейтті. Енді өңір жолдарында заманауи цифрлық технологиялар кеңінен қолданылуда.
Қоғамдық қауіпсіздікті қамтамасыз ету мақсатында тәртіп сақшылары құқық бұзушылықтарды автоматты түрде тіркейтін аппараттық-бағдарламалық кешендерді, жылдамдықты өлшейтін автоматты жүйелерді, сондай-ақ ұшқышсыз ұшу аппараттарын (дрондар) пайдалануда. Бұл технологиялар жол қозғалысын тәулік бойы бақылауға мүмкіндік береді.
-Аталған шаралар жазалау емес, ең алдымен алдын алу сипатына ие. Негізгі мақсат - жүргізушілердің жауапкершілігін арттыру, жол қозғалысы мәдениетін қалыптастыру және адам өмірін сақтау,-деді патрульдік полиция батальонының командирі Медет Нұрмұханов.
Мамандар жолдағы қауіпсіздік қарапайым талаптарды орындаудан басталатынын ескертеді:
- жылдамдық режимін қатаң сақтау;
- қауіпсіздік белдігін тағу;
- рөлде зейінді болу;
- жол белгілері мен таңбалардың талаптарын мүлтіксіз орындау.
«Жол қателікті кешірмейді» - бұл тек ескерту емес, күн сайын дәлелденетін шындық. Әрбір жауапсыз әрекет қайғылы салдарға әкелуі мүмкін.
Қарағанды облысының патрульдік полициясы өңір тұрғындарын тәртіп пен өзара құрмет қағидаларын ұстануға шақырады. Тек ортақ жауапкершілік арқылы ғана жолдарды қауіпсіз етіп, жол-көлік оқиғаларының санын азайтуға болады.