Қарағандылық полицейлер ауыл тұрғынының ақшасының жұмбақ жоғалуын әшкереледі

Қарағандылық полицейлер ауыл тұрғынының ақшасының жұмбақ жоғалуын әшкереледі
Қарағанды облысының Нұра ауданында 61 жастағы жергілікті тұрғын алаяқтықтың құрбаны болды. Аудандық полиция бөліміне жүгінген ер адам ұялы телефонының жоғалғанын және көп ұзамай банк картасынан ақша қаражатының түсініксіз жағдайда жоғалып кеткенін хабарлаған. Жедел-іздестіру шаралары барысында тәртіп сақшылары күтпеген жайтты анықтады: жәбірленушінің атына 375 мың теңге көлемінде онлайн несие рәсімделіп, бұл қаражат Қарағанды қаласының 31 жастағы тұрғынының есепшотына аударылған. Күдікті әйел ұсталып, полицияда берген жауабында кінәсін толық мойындады. Белгілі болғандай, ол жоғалған телефонды пайдаланып, ауыл тұрғынының жеке деректерін заңсыз қолданған және оның атынан несие рәсімдеп, ақшаны өз пайдасына аударған. Аталған факт бойынша қылмыстық іс қозғалып, іс материалдары сотқа жолданды. Қарағанды облысының полиция департаменті азаматтарды жеке деректерін мұқият қорғауға, бейтаныс адамдарға телефондары мен құпия мәліметтерін бермеуге, сондай-ақ мобильді қосымшалардағы қауіпсіздік параметрлерін үнемі жаңартып отыруға шақырады.