Қарағанды облысында фастфудқа тапсырыс берген тұрғын алаяқтық бабы бойынша тергелуде

Қарағанды облысында фастфудқа тапсырыс берген тұрғын алаяқтық бабы бойынша тергелуде
Қарағанды облысының Шахтинск қаласында алаяқтық фактісі тіркелді. Жергілікті тұрғын фастфудқа онлайн тапсырыс беріп, ақысын төлеуден бас тартқан. WhatsApp мессенджері арқылы ол жалпы сомасы 11 мың теңгені құрайтын ас мәзіріне тапсырыс жасап, оны жеткізу үшін такси қызметін пайдаланған. Алайда, ешбір қызмет үшін ақы төлеуді жоспарламаған. Тапсырыс толық орындалғаннан кейін, дөнер иесі бірнеше күн бойы клиентпен байланыс орнатуға тырысқан. Алайда тапсырыс беруші қоңыраулар мен хабарламаларға жауап бермей, екі апта бойы төлем жасаудан жалтарған. Ақысын ала алмаған кәсіпкер полицияға жүгінуге мәжбүр болды. Шахтинск қаласының полиция қызметкерлері жедел іздестіру шаралары барысында күдіктінің жеке басын анықтады. Ол — 27 жастағы жергілікті тұрғын болып шықты. Қазіргі уақытта аталған факті бойынша ҚР Қылмыстық кодексінің 190-бабы — "Алаяқтық" бойынша қылмыстық іс қозғалды. Тергеу амалдары жүргізілуде. Бұл жағдай шағын және орта бизнес субъектілері үшін маңызды сабақ бола алады. Құқық қорғау органдары кәсіпкерлерге онлайн тапсырыстар мен жеткізу қызметтерін жүзеге асырғанда клиенттердің төлем қабілеттілігіне қатысты қырағылық танытуға кеңес береді.