Отбасында жанжал шығарған 105 ер адамға психологиялық көмек берілді

Отбасындағы жанжалдан басталып зорлық-зомбылыққа ұласатын әрекеттерден зәбір көретіндердің басым бөлігі – әйелдер мен балалар. Отбасылық зорлық-зомбылыққа көз жұма қарауға болмайды. Тұрмыстық зорлық-зомбылық ісі енді жәбірленушінің шағымынсыз-ақ қаралады. Айта кетейік, жыл басынан бері Атырау облысында 5778 құқық бұзушылық тіркелген.

Оның ішінде:

- ар-намысына тиетін сөздер айту, қорлап тиісу, кемсіту іс- әрекеттері -2189;

- жеңіл дене жарақатын салу -331;

- ұрып соғу, дене жарақатын салу -1108.

Отбасы тұрмыстық қарым-қатынас аясында құқық бұзып, әкімшілік тәртіппен ұсталғандарды Атырау облысы ПД арнайы-қабылдау орнында Психолог кабинеті ашылып, шілде айынан бері жұмыс жасауда. Психолог-маман Ақмарал Шарипова ішімдікке салынған, өмірлік қиын жағдайларға тап болған және отбасылық жағдайы төмен адамдарға консультация беру жұмыстарын жүргізуде. Психолог кабинеті іске қосылғалы бері тәртіп сақшылары мамандармен бірлесіп 105 адаммен жұмыс жасаса, оның 25-і қалыпты жағдайға келіп, қазіргі уақытта 3 адам әлі мамандардан көмек алуда. Кеңес беру негізінен жеке және топтық сеанс болып екі кезеңде өткізіледі. Атырау облысы ПД Әкімшілік тәртіппен ұсталғандарды арнайы қабылдау орнында әр аптаның дүйсенбі, сәрсенбі және жұма күндері әкімшілік қамауда отырған азаматтарға арналған психолог кабинеті жұмыс жасайды. Бұл жерде әрбір тұлға психологпен жеке кездесіп, сұрақ қоя алады. Қоғамда отбасындағы тұрмыстық зорлық-зомбылықтың алдын-алу бағытында Атырау облысы ПД Жергілікті полиция қызметі басқармасы Әйелдерді зорлық-зомбылықтан қорғау тобының ерекше тапсырмалар жөніндегі аға инспекторы полиция майоры Райса Зинелғабиденқызы облыс әкімдігі жанындағы әйелдер істері және отбасылық-демографиялық саясат жөніндегі комиссиямен бірлесіп, әртүрлі бағытта іс-шаралар, семинар, тренингтер де өткізуде.

- Топтық сеанс өткізгенге қарағанда жеке кеңес алған тиімдірек. Себебі, жеке тұлға ретінде арнайы сұрақтарға жауап беру кезінде өзге адамдар алдында ашылу қиынға соғады. Психолог кабинетінің ашылуы әлеуметтік топтар үшін тиімдірек. Көп жағдайда психолог кабинетіне ер адамдар келеді. Олар бірнеше күн түрмеде немесе камерада жатып шыққан, үстерінен арыз жазылып уақытша қамауға алынғандықтан олармен қарым-қатынас ұстау өте қиын болып келеді. Ашылып сөйлеспеуі, тұйықтығы және барлық нәрсеге бәрібір деп мән бермей қарауы қиын. Жұмыстың күрделілігіне қарамастан жақсы нәтиже көрсетуде. Мәселен, қабылдауға келген бір тұлға өз әйелімен араздасып, үйге бармас үшін уақытын осы жақта өткізгенін айтты. Содан кейін сол тұлғаның қатысуымен отбасылық құндылықтар тақырыбында өткен топтық сеанстан кейін ол бірнеше жыл ішімдікке салынып, отбасын бағаламағанына өкінетінін білдірді,-дейді психолог маман Ақмарал Шарипова.

Қазіргі таңда республика көлемінде «Зорлық-зомбылыққа қарсы 16 күн белсенділік акциясы» өтуде. Акцияның негізгі мақсаты - көпшілікке әйелдерге қатысты зорлық-зомбылықты ескертуге, алдын алуға, ана мен баланы қорғауға, қоғамдағы отбасының рөлін күшейтуге қабылданып жатқан шаралармен таныстыру.