Балалар тағдырына араша болған атыраулық полицей ардагер - Гүлнар Ихсанқызы
Балалармен жұмыс істеу - мейірімділікпен қатар үлкен жауапкершілікті талап ететін қызмет. Әсіресе өмірдің түрлі сынағына тап болған, тағдыры күрделі балалармен жұмыс істеу үшін кәсіби біліктілікпен бірге сабыр мен жүрек жылуы қажет.
Қазақстан Республикасы ІІМ-нің құрметті ардагері, отставкадағы полиция подполковнигі Гүлнар Ихсанқызы Андакулованың қызмет жолы осындай талай баланың тағдырымен тығыз байланысты. Ол ұзақ жылдар бойы кәмелетке толмағандармен жұмыс істеп, қиын жағдайға тап болған балалардың қауіпсіздігі мен болашағына жауапкершілікпен қарады.
Гүлнар Ихсанқызы - Құрманғазы ауданының Шортанбай ауылында көпбалалы отбасында дүниеге келген. Мектептен кейін еңбек жолын Ленин атындағы Гурьев балық консерві комбинатында бастап, қоғамдық жұмыстарға белсене араласты. Кейін Ішкі істер органдарының қызметіне келіп, милиция формасын киіп, өмірін құқық қорғау саласымен байланыстырды.
1987 жылы Алматы орта арнаулы милиция мектебіне оқуға түсіп, 1991 жылы үздік дипломмен тәмамдады. Кейін Қазақстан Республикасы ІІМ Алматы жоғары мектебінде білімін жалғастырып, бұл оқу орнын да үздік дипломмен аяқтады.
Оның кәсіби жолындағы маңызды кезеңдердің бірі - кәмелетке толмағандарды қабылдау-бөлу орнындағы қызметі. Кейін бұл мекемені өзі басқарып, тағдыры күрделі балалармен тікелей жұмыс істеді.
Бұл жылдар Гүлнар Ихсанқызының жадында түрлі оқиғаларымен, қиын тағдырларымен сақталды. Солардың ішінде қала жұртшылығын дүр сілкіндірген жасөспірім қыздың қазасы ерекше орын алады. Оқиғаның мән-жайы оны әлі күнге дейін толғандырады.
Кейін Гүлнар Ихсанқызы осындай қиын жағдайға тап болған балалармен күнделікті жұмыс істеп, олардың мәселесін анықтауға, қауіпсіздігін қамтамасыз етуге және қоғамға қайта бейімделуіне күш салды.
Орталықта тәрбиеленушілерге төрт мезгіл тамақ беріліп, тазалық пен денсаулыққа, дене шынықтыруға көңіл бөлінді. Балалардың бос уақытын тиімді өткізуіне жағдай жасалып, түрлі мәдени және спорттық іс-шаралар ұйымдастырылды.
Гүлнар Ихсанқызы орталықтың материалдық жағдайын жақсартуға да ерекше күш жұмсады. Демеушілер іздеп, талай мекеме мен компанияның есігін қақты. Нәтижесінде ғимаратқа күрделі жөндеу жүргізіліп, спорт алаңдары жабдықталды, балаларға қажетті жағдайлар жасалды.
Орталық қызметкерлері әр баламен жеке жұмыс жүргізді. Жасөспірімдердің өміріндегі күрделі жағдайлардың себептерін анықтап, оларды дұрыс жолға бағыттауға тырысты. Кейбір балалардың ата-аналары табылып, отбасына қайтарылса, енді біреулері балалар үйіне орналастырылды.
Солардың қатарында вокзал маңынан құжатсыз табылған Юра мен Айбек есімді екі бала да болды. Олардың ата-аналарын табу мүмкін болмаған соң, балалардың жеке басын анықтау жұмыстары жүргізілді. Кейін екеуіне құжаттары рәсімделіп, балалар үйіне орналастырылды. Уақыт өте келе олардың тағдыры да оң арнаға түсті.
Орталықтағы еңбектің нәтижесі балалардың күнделікті өмірінен де көрінді. Туған күндер атап өтіліп, концерттер, байқаулар мен спорттық жарыстар ұйымдастырылды. Балалар өздерін қоғамнан тыс қалғандай сезінбеуі үшін ұжым қолдан келген жағдайдың бәрін жасауға тырысты.
* Бір концертте балалар мені сахнаға шақырып, «бастық» та, «директор» да демей, «біздің ортақ анамыз» деп атағанда, қатты толқыдым. Өмірімдегі ең үлкен марапатым - осы еді, - дейді Гүлнар Ихсанқызы.
2009 жылы ол зейнеткерлікке шыққанымен, балалармен жұмысын тоқтатпады. Атырау қаласы әкімдігінің ұсынысымен девиантты мінез-құлықты балаларға арналған арнайы мектептің директоры қызметін атқарды.
Гүлнар Ихсанқызы бүгінде сол жылдары бірге еңбек еткен әріптестерін де ризашылықпен еске алады. Оның айтуынша, орталықтағы әр қызметкердің өз міндеті болғанымен, барлығының ортақ мақсаты бір еді - балаларға қолдау көрсету және олардың өмірін дұрыс арнаға бағыттау.
Полициядағы ұзақ жылдық қызметінде талай қиындықты көрген ардагер үшін ең үлкен марапат - балалардың өміріндегі оң өзгерістер.
Гүлнар Ихсанқызының кәсіби жолы бір маңызды ойды көрсетеді. Қиын жағдайға тап болған балаға уақытында қолдау көрсету оның болашағына әсер етуі мүмкін. Ал сол сәтте жанынан табылып, бағыт-бағдар беру - үлкен жауапкершілікті талап ететін қызмет.
Бүгінде полиция ардагері ретінде ол жас ұрпақтың қауіпсіздігі мен тәрбиесіне қатысты мәселелердің маңызын жақсы түсінеді. Оның еңбек жолы балалар тағдырына жауапкершілікпен қараудың, қызметке адалдық пен адамға деген жанашырлықтың үлгісі болмақ.