413 мас жүргізуші, 38 жол апаты: рөлдегі жауапсыздық адам өміріне қауіп төндіреді

Мас күйде көлік басқару – жай ғана жол қозғалысы ережесін бұзу емес. Бұл – жүргізушінің өзін ғана емес, жолаушыларды, жаяу жүргіншілерді және жолдағы өзге азаматтарды қасақана қауіпке тігуі.

Атырау қаласында жыл басынан бері мас күйде көлік басқарудың 413 дерегі анықталды. Сонымен қатар мас жүргізушілердің қатысуымен 38 жол-көлік оқиғасы тіркелді. Әрбір осындай деректің артында адам өміріне төнген нақты қауіп тұр.

Мәселен, 30 қыркүйек күні сағат 22:15 шамасында патрульдік полиция қызметкерлері Перетаска ауылының Сапағали Шәкімов көшесінде Chevrolet Cobalt автокөлігін тоқтатты. Медициналық куәландыру нәтижесінде 2001 жылы туған жүргізушінің көлікті есірткілік масаң күйде басқарғаны анықталды.

Автокөлік арнаулы тұраққа қойылып, жүргізушіге қатысты әкімшілік іс құжаттары жинақталды. Материалдар шешім қабылдау үшін Атырау қаласының мамандандырылған әкімшілік сотына жолданды.

Мас күйдегі адамның зейіні төмендеп, қозғалысты бағалау қабілеті әлсірейді, әрекет ету жылдамдығы баяулайды. Мұндай жүргізуші кез келген сәтте қарсы бағытқа шығып кетуі, жаяу жүргіншіні қағуы немесе ауыр жол апатына себеп болуы мүмкін. Сондықтан мас жүргізушіні дер кезінде тоқтату – ықтимал қайғылы жағдайдың алдын алу.

Полиция азаматтарды:

* алкогольдік ішімдік немесе есірткі қолданғаннан кейін көлік басқармауға;

* мас адамның рөлге отыруына жол бермеуге;

* көлік кілтін жауапты әрі сау жүргізушіге тапсыруға;

* такси немесе қоғамдық көлік қызметін пайдалануға;

* жолда күмәнді қозғалған көлікті байқаған жағдайда полицияға хабарлауға шақырады.

Мас жүргізушіні көріп, үнсіз қалу – қауіпті жағдайға бейжай қарау. Уақытылы берілген бір хабарлама адам өмірін сақтап қалуы мүмкін.

Рөлге мас күйде отыру – жауапсыз таңдау. Ал оның салдары орны толмас өкінішке айналуы мүмкін.