Атырауда жол қауіпсіздігін қамтамасыз етуге бағытталған автошеру өтті

Атырау қаласы полиция басқармасының патрульдік полиция қызметкерлері жедел жәрдем, жолаушылар тасымалы және Төтенше жағдайлар департаментінің қызметкерлерімен бірлесіп жол қауіпсіздігіне арналған профилактикалық автошеру ұйымдастырды. Акция барысында жол-көлік оқиғасына ұшыраған автокөлік эвакуаторға тиеліп, қала көшелерімен жүргізілді. Бұл шара жол қозғалысына қатысушылардың назарын жол қауіпсіздігіне аударып, жол-көлік оқиғаларының ауыр салдарын көрсетуге бағытталды.

Айта кетейік, жыл басынан бері Атырау қаласы аумағында 750-ге жуық жол-көлік оқиғасы тіркеліп, 1000-нан астам адам түрлі дене жарақатын алған. Осыған байланысты полиция жүргізушілерді жол қозғалысы ережелерін қатаң сақтауға, жылдамдық режимін бұзбауға және жолдағы қауіпсіздікке жауапкершілікпен қарауға шақырады.