Атырау облысында тағы бір ауыл ішімдіктен бас тартты: Томан ауылы «Ішімдіксіз ауыл» бастамасына қосылған 57-ші елді мекен атанды

Атырау облысында «Ішімдіксіз ауыл» жобасы аясындағы игі бастама кең қолдау тауып келеді. Соның нәтижесінде Исатай ауданына қарасты Томан ауылы алкоголь өнімдерінен бас тарту туралы ортақ шешім қабылдап, өңір бойынша «Ішімдіксіз ауыл» қатарына қосылған 57-ші елді мекен атанды.

2026 жылдың 15–19 маусымы аралығында ұйымдастырылған акция барысында ауыл тұрғындары арасында қоғамдық тәртіпті сақтау, құқық бұзушылықтың алдын алу, салауатты өмір салтын қалыптастыру және алкоголь өнімдерінің зияны туралы кешенді түсіндіру жұмыстары жүргізілді. Тұрғындар бастаманы бірауыздан қолдап, ауылдың тыныштығы мен қоғамдық қауіпсіздігін сақтауға өз үлестерін қосудың маңыздылығын атап өтті.

Томан ауылы – берекесі мен бірлігі жарасқан елді мекендердің бірі. Мұны статистикалық көрсеткіштер де айғақтайды. Соңғы бес жыл ішінде ауыл аумағында бірде-бір қылмыс тіркелмеген. Бұл – тұрғындардың құқықтық мәдениетінің жоғары екенін, өзара сыйластық пен жауапкершіліктің қалыптасқанын көрсетеді.

Ауыл халқының басым бөлігі теміржол саласында еңбек етеді. Сонымен қатар елді мекенде мектеп, балабақша және мәдениет үйі тұрақты жұмыс істеп, тұрғындардың әлеуметтік және мәдени өміріне өз үлесін қосып келеді.

Жергілікті тұрғындар учаскелік полиция инспекторы Ербол Ұзақбаевтың жұмысына да ерекше ризашылық білдіреді. Халықпен етене араласып, олардың өтініштері мен мәселелеріне жедел назар аударуы, профилактикалық жұмыстарды жүйелі жүргізуі және қоғамдық тәртіпті сақтауға қосқан үлесі ауыл тұрғындарының сеніміне ие болған. Оның тұрғындармен тығыз қарым-қатынаста жұмыс істеуі ауылдағы қауіпсіздік пен тұрақтылықты қамтамасыз етудің маңызды факторларының бірі ретінде бағаланады.

«Ішімдіксіз ауыл» бастамасына қосылу – Томан ауылы үшін жай ғана таңдау емес, өскелең ұрпаққа өнеге болатын өмір салтын қалыптастыруға, құқық бұзушылықтың алдын алуға және қоғамдық келісімді нығайтуға бағытталған ортақ ұстанымның көрінісі. Өңірдегі 57-ші «Ішімдіксіз ауыл» атанған Томан ауылы бүгінгі таңда бірлік пен жауапкершіліктің, салауатты өмір салтының және қауіпсіз қоғам құрудың жарқын үлгісін көрсетіп отыр.