«Назар аударыңыз – балалар!» акциясы аясында интеллектуалдық сайыс өтті

Атырау облысы полиция департаментінің Әкімшілік полиция басқармасы мен Жастар ресурстық орталығының ұйымдастыруымен «Назар аударыңыз – балалар!» республикалық акциясы аясында жол қозғалысы қауіпсіздігін насихаттауға бағытталған «ХХІ ғасыр көшбасшысы» интеллектуалдық сайысы өтті.

Іс-шараға қаладағы 6 жалпы білім беретін мектептің оқушылары қатысты. Сайыс барысында жасөспірімдер жол қозғалысы ережелері, құқықтық сауаттылық және логикалық ойлау бағыттары бойынша білімдерін сынап, өзара бақ сынасты. Кездесу барысында полиция қызметкерлері оқушыларға жол қозғалысы ережелерін сақтау, қоғамдық тәртіпті бұзбау және қауіпсіздік талаптарына мұқият қарау жөнінде түсіндіру жұмыстарын жүргізді. Әсіресе, жаяу жүргіншілер өткелін дұрыс пайдалану, жол белгілеріне назар аудару, сондай-ақ түнгі уақытта қауіпсіздік шараларын сақтау қажеттігі кеңінен түсіндірілді.

Сайыс қорытындысы бойынша №43 орта білім беретін мектептің «Тәртіп сақшылары» командасы I орынды иеленсе, Исатай Тайманов атындағы орта білім беретін мектептің «Жас толқын» командасы II орынға тұрақтады. Ал Ыбырай Алтынсарин атындағы орта білім беретін мектептің «Бағдаршам жұлдыздары» командасы III орынды иеленді. Үздік нәтиже көрсеткен командалар дипломдармен және естелік сыйлықтармен марапатталды.

Іс-шараның негізгі мақсаты – жасөспірімдер арасында жол-көлік оқиғаларының алдын алу және қауіпсіз мінез-құлық дағдыларын дамыту.