Атырауда полиция отбасындағы құқық бұзушылықтардың алдын алу шараларын күшейтті

27 қаңтардан бастап облыс аумағында тұрмыстық құқық бұзушылықтардың алдын алуға бағытталған «Тұрмыс» жедел-профилактикалық іс-шарасы өткізілуде. Осы шара аясында №1 Атырау қалалық полиция бөлімінің Қоғамдық қауіпсіздік бөлімшесінің қызметкерлері учаскелік полиция инспекторларымен бірлесіп, жанжал жиі орын алатын отбасыларды тексеріп, профилактикалық жұмыстар жүргізуде.

Аталған аумақта жыл басынан бері «102» арнасына 100-ден астам хабарлама келіп түскен. Нәтижесінде 79 тұлғаға қорғау нұсқамасы шығарылып, 20 азаматқа сот шешімімен мінез-құлқына қатысты ерекше талаптар белгіленді. Бұл шаралар отбасындағы зорлық-зомбылықтың алдын алуға және қайталануына жол бермеуге бағытталған.

Егер сіз тұрмыстық зорлық-зомбылықтың құрбаны болсаңыз немесе осындай жағдайдың куәгері атансаңыз, дереу құқық қорғау органдарына хабарласуыңыз қажет. Кез келген уақытта «102» арнасы арқылы полиция қызметкерлерінен кеңес алып, көмек сұрауға болады.