«Адал полицей» акциясы аясында сыбайлас жемқорлықтың алдын алу мәселелері талқыланды
Атырау облысы полиция департаменті бастығының орынбасары полиция полковнигі Руслан Олжабайұлы Ешмановтың төрағалығымен жеке құрамға «Адал полицей» республикалық акциясы аясында ақпараттық дәріс өткізілді. Іс-шараның негізгі мақсаты – полиция қызметкерлері арасында адалдық, заңдылық және қызметтік әдеп қағидаттарын нығайту, сондай-ақ сыбайлас жемқорлық құқық бұзушылықтарының алдын алу тетіктерін түсіндіру.
Дәріске Мемлекеттік қызмет істері агенттігінің Атырау облысы бойынша департаментіне қарасты Сыбайлас жемқорлықтың алдын алу басқармасының басшысы Арман Абсиметов қатысып, полиция қызметкерлеріне сыбайлас жемқорлық құқық бұзушылықтары үшін Қазақстан Республикасының заңнамасында көзделген жауапкершілік, мемлекеттік қызметшілерге қойылатын талаптар және қызметтік этика нормаларын сақтау мәселелері жөнінде жан-жақты ақпарат берді.
Өз сөзінде спикер сыбайлас жемқорлықтың қоғамға, мемлекеттік басқару жүйесіне және құқық қорғау органдарының беделіне тигізетін кері әсеріне ерекше тоқталып, кез келген құқық бұзушылықтың алдын алу ең алдымен әрбір қызметкердің жеке жауапкершілігі мен адал ұстанымына байланысты екенін атап өтті. Сонымен қатар, мемлекеттік органдарда сыбайлас жемқорлық тәуекелдерін төмендету бағытында атқарылып жатқан профилактикалық шаралар мен бақылау тетіктері туралы мәлімет берілді.
Іс-шара барысында полиция қызметкерлеріне қызметтік міндеттерді орындау кезінде заң талаптарын қатаң сақтау, мүдделер қақтығысына жол бермеу, сондай-ақ сыбайлас жемқорлық көріністеріне төзбеушілік қағидатын қалыптастырудың маңыздылығы түсіндірілді. Қатысушыларға нақты мысалдар келтіріліп, құқық бұзушылықтардың салдары мен оның құқықтық жауапкершілігі жан-жақты баяндалды.
Дәріс соңында жиынға қатысушылар сыбайлас жемқорлық тәуекелдерін азайту жолдары, қызмет барысында адалдық пен ашықтықты сақтау, сондай-ақ құқық қорғау органдарындағы қоғам сенімін арттыру мәселелері бойынша пайдалы ақпарат алды. Мұндай профилактикалық кездесулер полиция қызметкерлерінің кәсіби мәдениетін арттыруға, заңдылық пен тәртіпті қамтамасыз етуге бағытталған маңызды қадам болып табылады.
Айта кету керек, «Адал полицей» республикалық акциясы аясында өңірде құқық қорғау органдары қызметкерлерінің сыбайлас жемқорлыққа қарсы иммунитетін қалыптастыруға бағытталған бірқатар іс-шаралар тұрақты түрде ұйымдастырылып келеді. Бұл бастамалар полиция қызметінің ашықтығын қамтамасыз етіп, азаматтардың құқық қорғау жүйесіне деген сенімін нығайтуға ықпал етеді.