Атырауда аса ауыр қылмысты әшкерелеген полицейлер марапатталды

Атырау облысы полиция департаментінде қызметтік міндетін абыроймен атқарып, аса ауыр қылмысты ашуда ерекше көзге түскен бірқатар полицейлер марапатталды. Тергеу әрекеттерін сапалы жүргізіп, кәсіби шеберлік танытқан тергеу басқармасының аса маңызды істер жөніндегі аға тергеушісі, полиция капитаны Темірхан Хажмұратов мерзімінен бұрын басшы құрамның арнаулы атағын алды.

 

Сондай-ақ ҚР Ішкі істер министрі, полиция генерал-лейтенанты Ержан Саденовтың бұйрығымен полиция подполковнигі Аслан Смағұл мен полиция майоры Наурызбек Рахманов «Құқық тәртібін қамтамасыз етуге қосқан үлесі үшін» медалімен марапатталды. Ал полиция майоры Серіжан Сабитов пен полиция капитаны Гүлфарида Төлегенова «Ішкі істер органдарының үздігі» төсбелгісіне ие болды.

 

Марапатқа себеп болған — 2024 жылы із-түссіз жоғалған Яна Легкодимоваға қатысты аса ауыр қылмысты ашуда атыраулық полицейлердің кәсібилігі мен жедел әрекеті. Тәртіп сақшылары бейнебақылау деректерін саралап, жедел іздестіру іс-шараларын ұйымдастырып, екі күдіктіні анықтап, істі толық ашты. Қос күдікті бүгінде сот үкімімен өмір бойына бас бостандығынан айырылды.

 

Қоғам қауіпсіздігін қамтамасыз ету жолындағы табанды еңбегі мен кәсіби біліктілігі үшін марапатталған атыраулық полицейлердің жұмысы — құқық қорғау саласындағы сенім мен жауапкершіліктің айқын көрінісі.