«Заң мен тәртіп» қағидаты аясында болашақ маман заңгерлермен кездесу өтті

«Заң мен тәртіп» қағидаты аясында Атырау облысы полиция департаментінің қызметкерлері Халел Досмұхамедов атындағы Атырау университетінің студенттерімен кездесті.

Жиын барысында Тергеу басқармасының аса маңызды істер жөніндегі аға тергеушісі, полиция майоры Темірхан Хажмұратов тергеу қызметінің маңызы, қылмыстық істерді ашуда қолданылатын негізгі әдістер және тергеушінің күнделікті жұмысы туралы айтты. Ол өз тәжірибесімен бөлісе отырып, дәлелдемелер жинау, оқиғаның мән-жайын анықтау, тұлғалармен сұхбат жүргізу, сараптамалар тағайындау және істі сотқа жолдау сияқты процестердің маңыздылығын түсіндірді.

Сонымен қатар, болашақ маман иелеріне арналған бос орындар жәрмеңкесі ұйымдастырылды. Жәрмеңкеде Жеке құраммен жұмыс басқармасы полицияда қызмет етудің артықшылықтары туралы жан-жақты ақпарат берді. Тәртіп сақшысы тұрақты жалақы, тегін медициналық көмек, жыл сайынғы 45 тәулік ақылы еңбек демалысы, қызметтік тұрғын үйді жалға алғаны үшін өтемақы, ипотеканы жеңілдетілген тәртіппен рәсімдеу, облыста қызмет өтілінің бір жылына бір жарым жыл ретінде есептелуі, зейнеткерлікке ерте шығу және нысанды киімнің тегін берілетіні туралы айтып өтті.

 

Ішкі істер органдарында қызмет атқаруға үміткерлер 18 бен 35 жас аралығында болуы, денсаулық жағдайы бойынша қызметке жарамды болуы және орта, орта-арнаулы немесе жоғары білімі болуы қажет.

 

Қызметке орналасуға ниетті азаматтар Атырау облысы полиция департаментінің 98-24-44, 98-21-77 нөмірлеріне хабарласа алады.