Елордалық полицейлер қаруды сатып алу бойынша акция өткізуде

Астана қаласының полиция департаменті ағымдағы жылдың 22 сәуірінен бастап қоғамдық қауіпсіздікті қамтамасыз ету деңгейін арттыру мақсатында халықтан заңсыз сақталған атыс қаруын, оқ-дәрілерді және жарылғыш заттарды сатып алу бойынша акция өткізеді.
Қару-жарақ заттарын қабылдау әрбір аумақтық полиция органында жүргізіледі.
Қару-жарақ заттарын ерікті түрде тапсырғаны үшін қарудың техникалық жай-күйіне байланысты оның әрбір бірлігі үшін оннан жүзге дейінгі айлық есептік көрсеткіш сомасында республикалық бюджеттен төлем көзделеді.
Жарақаттанудың алдын алу мақсатында полицейлер табылған жарылғыш материалдармен және оқ-дәрілермен ешқандай әрекет жасамауға, ешбір жағдайда оларды тасымалдауға тырыспауға, бұл туралы полицияның кез келген бөлімшесіне, сондай-ақ 102 нөмірі немесе 112 нөмірі бойынша хабарлауға кеңес береді.
Тіркелмеген атыс қаруын, оқ-дәрілерді және жарылғыш заттарды өз еркімен тапсырған азаматтар қылмыстық және әкімшілік жауапкершіліктен босатылады.
Полиция департаменті өткізілетін акцияға халықтың белсенді қатысуын және түсіністікпен қарауын сұрайды.