Азаматтардың өтініштерінен цифрлық мониторингке дейін: Астана қаласы ПД басшылығы қауіпсіздікті қамтамасыз етудің заманауи тетіктерімен танысты

Бүгін Астана қаласы Полиция департаментінің басшылық құрамы қалалық ахуалды бақылау және туындаған жағдайларға жедел ден қою бағытында жұмыс істейтін iKOMEK109 қалалық мониторинг және жедел әрекет ету орталығына барып, цифрлық платформалардың жұмысымен танысты.
Сапар барысында Полиция департаментінің өкілдері орталықтың жұмыс тәртібін, негізгі қызмет бағыттарын және қалалық қызметтермен өзара іс-қимыл тетіктерін зерделеді.
iKOMEK109 елорда тұрғындары мен қалалық қызметтер арасындағы бірыңғай байланыс алаңы қызметін атқарады. Азаматтардан келіп түскен өтініштер тіркеліп, санаттарға бөлініп, тиісті бөліністерге жолданады және олардың орындалуы кейіннен бақылауға алынады. Бұл тәсіл келіп түскен хабарламаларға жедел ден қоюмен қатар, қаланың түрлі аудандарында туындайтын мәселелерді жүйелі түрде талдауға мүмкіндік береді.
Сапар аясында «Astana Innovations» компаниясының қызметі және елордада іске асырылып жатқан «ақылды қала» тұжырымдамасын дамытуға, қалалық сервистердің тиімділігін арттыруға және тұрғындардың игілігі үшін заманауи технологияларды пайдалануға бағытталған цифрлық жобалар таныстырылды.
Полиция департаментінің басшылығына қалалық инфрақұрылым мен нысандарды нақты уақыт режимінде бақылау мүмкіндіктері көрсетілді. Цифрлық құралдардың көмегімен белгілі бір аумақтардағы ахуалды бақылауға, штаттан тыс жағдайлар мен құқық бұзушылықтарды жедел анықтауға, сондай-ақ ақпаратты тиісті қызметтерге уақтылы беруге болады.
Мұндай технологиялардың қоғамдық қауіпсіздікті қамтамасыз етуде маңызы ерекше. Жедел мониторинг ықтимал қауіпті жағдайларға дер кезінде назар аударуға, оқиға орнын анықтауға және тиісті бөліністердің уақтылы әрекет етуін қамтамасыз етуге мүмкіндік береді.
Осылайша, заманауи цифрлық шешімдер құқық қорғау органдарының дәстүрлі жұмыс тетіктерін толықтыра түседі. Қаладағы ахуал туралы ақпарат азаматтардың iKOMEK109 арқылы тікелей жолдаған өтініштері негізінде де, автоматтандырылған мониторинг арқылы да қалыптасуы мүмкін.
«Бүгінде заманауи қаланың қауіпсіздігі ақпаратты қаншалықты жылдам алатынымызға және оған қаншалықты жедел ден қоя алатынымызға тікелей байланысты. Азаматтардың өтініштері, цифрлық мониторинг мүмкіндіктері мен құқық қорғау органдарының жұмысы бірыңғай өзара іс-қимыл жүйесіне біріктірілуі маңызды. Бұл туындаған жағдайларға жедел ден қойып қана қоймай, ықтимал тәуекелдерді алдын ала анықтауға мүмкіндік береді. Қарқынды дамып келе жатқан елорда – Астана үшін мұндай технологияларды енгізудің маңызы ерекше», – деді Астана қаласы Полиция департаментінің бастығы, полиция генерал-майоры Марат Төлебаев.

Заманауи технологияларды, қалалық мониторинг пен жедел әрекет ету тетіктерін ықпалдастыру елорда тұрғындарының қауіпсіздігін қамтамасыз етуге және мемлекеттік қызметтердің жұмыс тиімділігін арттыруға қосымша мүмкіндік береді.