Рөлді мас күйдегі досына тапсырған: елордада екі жүргізуші жауапкершілікке тартылды

Демалыс күндері «Мас жүргізуші — қылмыскер!» жедел-профилактикалық іс-шарасы аясында полиция қызметкерлері алкогольдік мас күйде көлік басқару фактілерін анықтауда. Өткен демалыс күндері осындай 20 құқық бұзушылық тіркелді.
Түнгі уақытта патрульдеу барысында Шәмші Қалдаяқов көшесінде полиция қызметкерлері Toyota Camry маркалы автокөлікті тоқтатты. Рөлде алкогольдік мас күйдің айқын белгілері бар 36 жастағы ер адам болған. Тексеру барысында көлік құралының иесі жолаушы орындығында отырғаны және оның да мас күйде болғаны, сондай-ақ автокөлікті басқаруды өзінің мас танысына бергені анықталды.
Медициналық куәландыру екі азаматтың да алкоголь қолданғанын растады. Құқық бұзушыларға қатысты ҚР ӘҚБтК-нің 608-бабы 1-бөлігі бойынша әкімшілік материалдар толтырылды.
Сот қаулысымен екі тұлға да 7 жыл мерзімге көлік құралын басқару құқығынан айырылып, әрқайсысына 15 тәулікке әкімшілік қамақ тағайындалды.
Жыл басынан бері алкогольдік мас күйде көлік басқару фактілері бойынша 54 құқық бұзушылық анықталды.
Астана қаласының Полиция департаменті ескертеді: мас күйдегі адамға көлік басқаруды беру — мас күйде көлік жүргізумен тең дәрежедегі ауыр құқық бұзушылық болып саналады және дәл сондай жауапкершілікке әкеп соғады. Жауапкершілікті ұмытпай, жол қозғалысына қатысушылардың өміріне қауіп төндірмеңіз.