Астанада отбасындағы зорлық-зомбылыққа қарсы акция басталды

Астана қаласының полициясы қала әкімдігі жанындағы Әйелдер істері және отбасылық-демографиялық саясат жөніндегі комиссиямен бірлесіп, отбасындағы кез келген зорлық-зомбылықтың алдын алуға, аналық пен балалықты қорғауға, сондай-ақ қоғамда отбасының рөлін нығайтуға бағытталған «Гендерлік зорлық-зомбылыққа қарсы 16 күндік белсенді іс-қимыл» акциясын бастады.
Акция аясында:
– Бұрын агрессорларға қатысты қорғау және ерекше талаптар қойылған отбасылардың жағдайын зерделеу, зорлық-зомбылық көріністерін анықтау және алдын алу мақсатында пәтерлерді және аулаларды аралау;
– Отбасылармен психологтар мен мамандардың қатысуымен жұмыс жүргізу, дағдарыс орталықтарында, еңбек ұжымдарында және қоғамдық орындарда ақпараттық кездесулер өткізу жоспарланған. Іс-шараларға мемлекеттік органдар мен қоғамдық ұйымдардың өкілдері де тартылады.
Іс-шаралардың мақсаты – азаматтардың құқықтарын түсіндіру, зорлық-зомбылықтың алдын алу, оның орын алған жағдайында әрекет ету тәртібі туралы хабардар ету және зорлық-зомбылықтың түрлі түрлерінен қорғану жөніндегі нұсқаулықтармен таныстыру.
Елордалық полиция қызметі бұл бағыттағы жұмысын жалғастырып келеді: тұрмыстық-зорлық-зомбылыққа қарсы күрес бөлімі жұмыс істейді, профилактика шаралары жүргізіліп, зардап шеккендерге кешенді көмек көрсетіледі. Биылғы жылдың басынан бері құқық қорғау органдарына отбасылық-тұрмыстық зорлық-зомбылық фактілері бойынша 8000-нан астам өтініш түсті, олардың барлығы бойынша тиісті шаралар қабылданды. Бірқатар жағдайларда қорғау нұсқамалары шығарылып, ерекше талаптар белгіленді, сондай-ақ жекелеген фактілер бойынша сот агрессорларға психокоррекциялық жұмыстардан өтуді міндеттейтін қаулылар қабылдады.