Ата заң құрдасы-елордалық полицей

Астана қаласы Полиция департаментінде ерекше қызметкер еңбек етеді. Рүстем Қуаныш - Қазақстан Республикасының Ата заңымен құрдас, Жылдам қимылдайтын арнайы жасағының 1995 жылы дүниеге келген жас офицері. Бүгінде елордалық полиция қатарында абыройлы қызмет атқарып, Отан алдындағы антқа адалдығын күнделікті еңбегімен дәлелдеп жүр.
Қызметке кіріскен күннен бастап қоғамдық тәртіпті қорғау, азаматтардың тыныштығын сақтау және құқық бұзушылықтардың алдын алу бағытында белсенді жұмыс істеп келеді.
– «Мен үшін еліміздің Ата заңы – Конституциямен бір жылда дүниеге келу – үлкен мақтаныш. Конституция – тәуелсіз Қазақстанның іргетасы, ал біз, полиция қызметкерлері, осы заңдылықты сақтаудың алдыңғы шебінде тұрған азаматтармыз. Азаматтардың құқықтары мен бостандықтарын қорғау – басты міндетіміз», – дейді жас тәртіп сақшысы.
Рүстем қызмет бабындағы міндетін адал атқарып қана қоймай, шығармашылыққа жақын. Ол – мобилографиямен айналысып, бейнемонтаж жасауды ұнататын полицей. Бос уақытында бейнероликтер түсіріп, түрлі монтаж жасаумен шұғылданатын сақшының айтуынша, бұл хобби оған қызметте де көмектеседі.
Рүстем Русланұлы 8 жыл бойына бапкерлікпен айналысқан. Ол таэквондо спорт түрінен «қара белбеу» иегері және «спорт шеберіне үміткер».
Әріптестері оны жауапты, еңбекқор әрі білікті маман ретінде сипаттайды. Кәсібилігімен қатар, жан-жақтылығы үшін ерекше бағалайды. Өз міндетіне адал, халықпен тіл табыса білетін қасиеті үшін тұрғындардың сеніміне ие болған.
Конституция күні қарсаңында елордалық полиция департаменті жас офицердің бейнесін Қазақстанның жаңа буынына тән символ ретінде санайды. Өйткені ол – тәуелсіздікпен бірге қалыптасқан жас ұрпақтың жарқын өкілі, заңға құрметпен қарайтын, мемлекетке адал қызмет ететін азамат.