Астана полицейлері Спартакиадада жүлделі орындарға ие болды

Атырау қаласында Қазақстан Республикасы Ішкі істер министрлігінің XII Спартакиадасы бағдарламасы аясында қоян-қолтық ұрыс бойынша республикалық жарыс өтті. Елдің әр аймағынан келген тәртіп сақшылары бақ сынаған додада Астана қаласы Полиция департаментінің спортшылары ерекше көзге түсіп, жекелей және командалық есепте жүлдегер атанды.
Жарыс нәтижесінде 62 келі салмақтағы Жедел қимылдайтын арнайы жасақ инспекторы полиция аға лейтенанты Зейнуллов Алмаз және 70 келі салмақтағы Криминалдық полиция басқармасының жедел уәкілі полиция аға сержанты Арай Мусина 1 орынға ие болса, 80 келі салмақтағы Оқу-жаттығу ротасының қызметкерлері полиция аға лейтенанты Мейрамбек Мұқанбетқалиев пен 97 келі салмақтағы полиция капитаны Ерболат Берген 2 орынды қоржындарына байлады.
Жекелей сындардағы бұл жетістіктердің нәтижесінде Астана қаласы Полиция департаментінің құрамасы жалпы командалық есепте қола жүлдеге ие болды.
Мұндай жарыстар полицейлердің тек кәсіби шеберлігін ғана емес, сонымен қатар ерік-жігері мен спорттық шыңдалуын айқындайды. Бұл жетістік астаналық тәртіп сақшыларының спорттағы әлеуетінің жоғары екенін көрсетіп отыр.