Астанада мас ер адам бір күнде екі ұрлық жасады

«Қылмысты тоқтату» жедел-алдын алу іс-шарасы аясында елордалық полицейлер бір күнде екі рет ұрлық жасаған деген күдікпен ер адамды ұстады.
49 жастағы Астана тұрғыны алкогольдік мас күйде алдымен қаладағы қонақ үйлердің бірінің холына кіріп, қызметкерлердің аңғалдығын және еркін қолжетімділікті пайдалана отырып, екі ұялы телефонды ұрлап кеткен. Оның бірі – әкімшіге тиесілі болса, екіншісі – қонақтардың бірі қуаттауға қалдырған құрылғы болған.
Кейінірек күдікті ұялы телефон аксессуарларын сататын бөлімге кіріп, сауда сөресінің артына өтіп, витринадан құлаққапты жымқырып кеткен. Бұл жолы да ол бақылаудың жоқтығын және тауардың ашық орналасуын пайдаланған.
Күдіктінің жеке басы бейнебақылау камераларының жазбалары арқылы жедел анықталып, ол ұсталып, уақытша ұстау изоляторына қамалды. Аталған факті бойынша Қылмыстық кодекстің 188-бабы (Ұрлық) бойынша сотқа дейінгі тергеу жүргізілуде.
Полиция мүліктік қылмыстардың алдын алу және ашу бағытында жұмыстарды жалғастырып жатыр және сауда орындарының иелері мен қызмет көрсету саласының өкілдеріне қауіпсіздік шараларын күшейтудің маңыздылығын ескертеді: тауарларға тікелей қолжетімділікті шектеу, жеке заттарды қараусыз қалдырмау, нысанды бақылаумен қамтамасыз ету және күдікті әрекеттерге жедел әрекет ету қажет.