Алматы полициясы ата-аналарды балаларға бақылауды күшейтуге шақырды

Алматы қаласында «Стоп – бұзушылық» ауқымды өңірлік жедел-профилактикалық іс-шарасы аясында кәмелетке толмағандардың қауіпсіздігін қамтамасыз етуге бағытталған профилактикалық жұмыстар күшейтілуде.

Алдағы демалыс кезеңіне ерекше назар аударылуда. Бұл уақытта мектеп оқушыларының бос уақыты көбейіп, олардың түрлі қауіп-қатер жағдайларына тап болу тәуекелі артады.

Осыған байланысты Алматы қаласы ПД Қоғамдық қауіпсіздік басқармасының бастығы Тимур Ноғайбаев қала тұрғындары мен қонақтарына үндеу жасады.

«Алда демалыс кезеңі – бұл тынығу, жаңа әсерлер мен еркін қарым-қатынас уақыты. Алайда дәл осы уақытта балалардың түрлі қауіпті жағдайларға тап болу қаупі артады. Сондықтан әрбір ата-ана баласының қайда жүргенін, немен айналысып жатқанын және кіммен уақыт өткізетінін нақты білуі аса маңызды», – деді Тимур Ноғайбаев.

Полиция өкілдері кәмелетке толмағандар арасындағы құқық бұзушылықтардың алдын алу ең алдымен ата-аналардың жауапкершілігі мен белсенді қатысуына байланысты екенін атап өтті.

«Балаларыңыздың бос уақытын бақылауда ұстаңыздар, олармен тұрақты байланыс орнатыңыздар, өміріне бейжай қарамаңыздар. Жол қозғалысы ережелерін үнемі ескертіп, көшеде қауіпсіз мінез-құлық мәдениетін қалыптастырыңыздар. Кәмелетке толмағандардың самокат, мопед және басқа да жауапкершілік пен дағдыны талап ететін көлік құралдарын басқаруына жол бермеңіздер. Әсіресе кешкі және түнгі уақытқа ерекше көңіл бөліңіздер», – деп атап өтті ол.

Ведомствода атап өткендей, балалардың қауіпсіздігін қамтамасыз етудегі негізгі фактор – ата-аналардың жауапкершілігі мен қамқорлығы.

«Ата-ананың қамқорлығы мен назарында болу – баланы түрлі қауіп-қатерден қорғаудың ең сенімді жолы. Тек бірлескен күш-жігердің арқасында ғана біз балаларымыздың өмірі мен денсаулығын сақтап, Алматыны әрбір тұрғын үшін қауіпсіз қалаға айналдыра аламыз», – деп түйіндеді Тимур Ноғайбаев.